சாமான்ய மக்களைக் கவனியுங்க மகாராஜா..!

"முதலில், வயிற்றுப்பாட்டையும், வயிற்றுக்கு சோறு போடுபவர்களையும் கவனியுங்க மோடி மகாராசா! புல்லட் ரயில் கனவுகள் எல்லாம் எங்களுக்கில்லை மன்னவா..!"

தற்போது, தி இந்துவில் வாக்களிக்க: http://tamil.thehindu.com/

Read More

யாருக்கு சுவனம் சாத்தியம்?

மனிதன் பதற்றக்காரனாகப் படைக்கப் பட்டிருக்கிறான் என்பது உண்மை. ஒரு துன்பம் அவனுக்கு நேர்ந்துவிட்டால், பதறித் துடித்துப் போகிறான். பொறுமையிழந்து தவிக்கிறான். ஆனால், அந்தத் துன்பம், துயரம் அவனைவிட்டு நீங்கி வசதி வாய்ப்பு ஏற்படும்போது, கஞ்சத்தனம் புரிகிறான். >>>> இக்வான் அமீர் <<<<

 

''''''''''''''''''''''''''''''''''''''''''''''''''''''''''''

திருக்குர்ஆனின் கட்டளைகள் மற்றும் திருநபிகளாரின் சொல், செயல், அனுமதிகளின் தொகுப்பான நபிமொழிகள் ஆகியவற்றின் வழிகாட்டுதலே இஸ்லாமிய வாழ்க்கை நெறி எனப்படுகிறது. சமூக அமைப்பின் கட்டமைப்பு முழுவதும், நல்லொழுக்கத்தின் அடிப்படையில் அமைய வேண்டும் என்பதே இதன் நோக்கம்.

“வணக்கத்துக்குரியவன் ஒரே இறைவனைத் தவிர வேறு கடவுளர் இல்லை! முஹம்மது நபிகளார் இறைவனின் தூதர்!” என்ற ‘கலிமா’ எனப்படும் சொற்றொடரைப் பிரகடனப்படுத்தி, தொழுகை, நோன்பு, ஜகாத் மற்றும் ஹஜ் எனப்படும் ஐந்து கடமைகள் மூலமாக அதைச் செயல்படுத்துபவர்கள் முஸ்லிம்கள் எனப்படுகிறார்கள்.

வெறுமனே யாரும் சுவனத்தில் நுழையும் வாய்ப்பில்லை. அதற்கு இறைவனின் கருணை என்னும் அனுமதி தேவை. அதைப் பெறுவதற்கான தகுதிகளை வளர்த்துக்கொள்ள திருக்குா்ஆனில், இறைவன் ஒரு பட்டியலே தருகிறான். அதைப் பின்பற்றி நடக்க வலியுறுத்துகிறான்.

கஞ்சத்தனம் புரிகிறான்

''''''''''''''''''''''''''''''''''''''''''''''''''''''''''

மனிதன் பதற்றக்காரனாகப் படைக்கப் பட்டிருக்கிறான் என்பது உண்மை. ஒரு துன்பம் அவனுக்கு நேர்ந்துவிட்டால், பதறித் துடித்துப் போகிறான். பொறுமையிழந்து தவிக்கிறான். ஆனால், அந்தத் துன்பம், துயரம் அவனைவிட்டு நீங்கி வசதி வாய்ப்பு ஏற்படும்போது, கஞ்சத்தனம் புரிகிறான்.

இந்தப் பலவீனத்திலிருந்து விலகிய பண்பாளர்கள் குறித்து திருக்குா்ஆனில் இறைவன் ஒரு பட்டியலிடுகிறான். இந்தப் பட்டியலில் முதலாவது இடம் பெறுவது தொழுகையாளிகள். இவர்கள் ஐந்து வேளை தொழுகைகளைத் தவறாமல் கடைப்பிடிப்பவர்கள். அத்தோடு, தங்கள் செல்வங்களில் யாசிப்போருக்கும் தேவையுள்ளோருக்கும் பங்கு உண்டு என்று நம்புகிறவர்கள். உடலால் குனிந்து, நிமிர்ந்து சிரம் பணிவது என்ற நிலையில் மட்டும் இவர்கள் இருப்பதில்லை. மாறாக, சமூத்தின் நலிந்த பிரிவினருக்கும் தங்கள் செல்வத்தில் ஜகாத் என்ற பிரிவின் அடிப்படையில் பங்கிருப்பதாக நம்புபவர்கள். அதை ஆண்டுதோறும் ரமலான் காலங்களில் தவறாமல் அதற்குரிய சரியான அளவில் கணக்கிட்டுத் தேவையுள்ளோருக்குப் பங்களிப்பவர்கள். அப்படிப் பிரித்துத் தராமல் இருப்பது தங்கள் செல்வத்தை அசுத்தமாக்கிவிடும் என்று உறுதியாக நம்புபவர்கள்.

நபித்தோழர் அபூபக்கர், ஜனாதிபதியாகப் பொறுப்பில் இருந்தபோது, ஜகாத் தராதவர்களைச் சட்டரீதியாகத் தண்டிக்க முனைந்தார். அவர்கள் ஐந்து வேளை தொழுகையை விடாமல் தொழுபவர்களாக இருந்தாலும் சரியே!

உண்மையில், திருக்குா்ஆனில் தொழுகை சம்பந்தமாக திருவசனங்கள் இடம்பெறும் இடங்களில் எல்லாம் கூடவே ஜகாத் குறித்தும் வலியுறுத்தப்படுகிறது.

ஜகாத் என்னும் சமூக நலநிதியை இறைவனுக்கு அளிக்கும் அழகிய கடன் என்றும் திருக்குா்ஆன் வர்ணிக்கிறது.

வெற்றிக்கான ரகசியம்

''''''''''''''''''''''''''''''''''''''''''''''''''''''

உயர்பண்பாளர்களின் அடுத்த முக்கியமான பண்பு, உதட்டளவில் அல்லாமல் மனப்பூர்வமாகத் தங்கள் செயல்கள் அனைத்துக்கும் மறுமையில் பதில் அளிக்க வேண்டும் என்று நம்பிச் செயல்படுவது.

மறுமையில் வெற்றியாளருக்குரிய செயலேட்டை வலக்கரத்தில் பெறுபவர், தனது வெற்றிக்கான ரகசியத்தை இப்படிக் கூறுவார்:

“இதோ... பாருங்கள் படியுங்கள் எனது வினைச்சுவடியை! நிச்சயம் என்னுடைய கணக்கைச் சந்திப்பேன் என்று எண்ணியே நான் வாழ்ந்திருந்தேன்!”

அடுத்த பண்புநலன், இறைவனின் தண்டனை குறித்து, சதா அச்சம் கொண்டிருப்பவர்கள்.

மறுமையில் இறைவனின் தண்டனை குறித்த அச்ச உணர்வு சம்பந்தமாக ஒருமுறை நபித் தோழர்களுக்குச் சந்தேகம் எழுந்தது. அதை நபிகளாரிடம் கேட்கவும் செய்தார்கள்.

“இறைவனின் திருத்தூதரே! இறைத்தண்டனை குறித்து எங்களைப் போலவே தாங்களும் அச்சம் கொண்டிருக்கிறீர்களா?“

“இறைத்தண்டனை குறித்து அச்சமில்லாமல் எப்படி இருக்க முடியும் தோழர்களே அதைக் குறித்த அச்சத்துடனேயே சதா நான் வாழ்கிறேன்!” என்று நபிகளாரும் பதிலளித்தார்.

அடுத்த பண்பு நலன், இல்லற உறவைத் தவிர, விபச்சாரம் போன்ற தீமைகளிலிருந்து விலகி இருப்பவர்கள்.

இதற்கும் அடுத்ததாக, ஒப்படைக்கப்பட்ட அமானிதப் பொருட்களைப் பாதுகாப்பவர்கள், செய்துகொண்ட ஒப்பந்தங்களை மதித்து நடப்பவர்கள், சாட்சியங்களின் போது, நீதியில் நிலைத்திருப்பவர்கள் என்று பண்பாளர் பட்டியல் தொடர்கிறது.

சும்மா கிடைப்பதில்லை வெற்றியின் கோப்பைகள்!

நல்ல பண்புகளை வளர்த்துக்கொள்வதன் மூலமே சுவனங்களை அடைய முடியும். உயர்பண்பாளர்களின் இருப்பிடம்தான் சுவனம்.

(தி இந்து, ஆனந்த ஜோதியில், 14.09.2017 அன்று பிரசுரமான எனது கட்டுரை)

தி இந்துவில் வாசிக்க: http://tamil.thehindu.com/society/spirituality/article19676256.ece 

 

 

Read More

இன்னார்க்கு இன்னார் என்று எழுதி வைத்தானே தேவன் அன்று....

அன்பு நண்பர் ஒளிப்பட வித்தகர் சுபான் பீர் முஹம்மது, தனது திருமண நாளன்று  முகநூலில் https://www.facebook.com/subhan.mohamed.5/posts/10212695087706457 பதிவேற்றிய நினைவலை இது. அழகான வட்டார மொழியில், மலராய் சரம் சரமாக தொடுத்து நினைவுகூர்ந்திருந்த நினைவுகள். மணமக்கள் எல்லா நலமும், வளமும் பெற்று நீண்ட ஆயுளுடன் வாழ வாழ்த்துகிறேன். இனி சுபானின் நினைவுகள் அவரோடு எழுத்துக்களாய்.. -இக்வான் அமீர்

எந்த ஒரு நோய் நொடி என்றாலும் நாசரேத் லூக்காஸ் ஆஸ்பத்திரிக்குத்தான் போகணும்.. எங்க ஊரு பக்கத்துலே அந்த காலத்துலே அதுதான் பெரிய மிசன் ஆஸ்பத்திரி. தம்பிக்கு உடல்நலக்குறைவு இளப்பு அதிகமாகிவிட்டது.உம்மா ,அக்காச்சி என்கிற முதிய பெண்மணியும் ஆறு வயதான அவனையும் அழைத்துக்கொண்டு ஆஸ்பத்திரிக்கு வந்தாகிவிட்டது இரண்டு நாள் தங்கி பார்க்கனுன்னு டாக்டர் சொல்லிட்டார். குசினி வார்டில் ரூம். அவசரமா புறப்பட்டதால் சமையல் பாத்திரங்கள் அதிகம் எடுத்து வரவில்லை.

அடுத்த நாள் காலை அவனிடம், "வாப்பா, பே வார்டுலே நம்ம ஊர்காரங்க பிரசவத்துக்கு வந்துருகாங்கலாம். அவங்ககிட்ட போயி டீ போட ஒரு வலந்து (பாத்திரம் ) வாங்கிட்டு வாம்மா"

அவனும் பே வார்டு போய் அங்கிருந்த வயதான கம்மா (பாட்டி) விடம் சலாம் சொல்லி “இன்னாங்கோ எனக்கு சித்தன் தெருவு, பகரைன் வீடு, தம்பிக்கு சுகமில்லை குசினி வார்டுலே தங்கி இருக்கோம் உம்மா உங்ககிட்டே டீ போட ஒரு வலந்து வாங்கிகிட்டு வர சொன்னோ”

அந்தம்மா பாத்திரம் எடுக்க அடுப்பாங்கறை போக இவன் மெதுவாக அந்த அறையை நோட்டமிட்டான். பிரசவம் முடிந்து தாய் அரை மயக்கத்தில் தூங்கி கொண்டிருக்க அருகே ஆஸ்பத்திரிக்கு சொந்தமான வெள்ளை நிற இரும்பு தொட்டிலில் குழந்தை.

“வாப்பா, இந்த இதை கொண்டு போயி உம்மாகிட்டே கொடு” அவன் பாத்திரத்தை வாங்கி புறப்பட முற்பட்ட போது, "பொம்பளை புள்ளே பொறந்திருக்கு. காலைலே தான் பொறந்தா. அவோ வாப்பா மூணு நாளா கூடவே இருந்துட்டு நேத்து நைட்டு தான் அவசர வேலைன்னு திருநெல்வேலி போனோ. புள்ளைய பார்த்து மோந்துட்டு (முகர்ந்துவிட்டுப்) போமா”

தொட்டிலின் கிட்டே சென்று எட்டிபார்கிறான் பிஞ்சு கை கால்களை அசைத்தபடி சிறிய விழிகளால் அவனை நோக்கி புன்னகைத்த அவளின் நெற்றியில் முத்தமிட்டு கன்னத்தை விரல்களால் வருடி அந்த விரல்களுக்கும் ஒரு முத்தம் தந்து பாத்திரத்தோடு புறப்பட்டான் அவன்.

ஆறு வருடங்களுக்கு பின்னர்...

பக்கத்துக்கு வீட்டு முறுக்கு கஸ்ஸாலியப்பா குடும்பத்துடன் ஏரலுக்கும் பழைய காயலுக்கும் இடையே உள்ள கஸ்ஸாலி மரைக்கார் சாலையில் தர்காகந்தூரிக்கு செல்ல நானும் கூடப்போவேன் என உம்மாவிடம் அடம்பிடிக்க அரை மனதுடன் அவர்களோடு செல்ல அனுமதி வழங்கப்பட்டது.

தர்காவும் அம்மன் கோவிலும் அடுத்து அடுத்து ஒற்றை சுவர் கொண்டுப் பிரிக்கப்பட்டிருக்கும். அம்மன் கோவிலையொட்டி அகன்ற வாய்கால். அதன் கரைகளில் பெரிய தடித்த மரங்கள் கால்வாய்க்கு கூரை போட்ட மாதிரி தன் கிளைகளை பரப்பி படர்ந்து இருக்கும். மரங்களில் ஏறி கால்வாய்க்குள் குதிப்பது சிறார்களின் விளையாட்டாய் இருந்தது.

தண்ணீர் வருகின்ற பகுதியில் பெண்களும் சற்று தள்ளி தண்ணீர் போகின்ற பகுதியில் ஆண்களும் துணிகள் துவைத்துக் கொண்டும் குளித்துக் கொண்டும் இருந்தார்கள்.

இவன் மரத்தில் ஏறி குதிக்க தயாரானபோது பெண்கள் பகுதியில் படிக்கட்டில் அமர்ந்து இருந்த சிறுமி கால் தவறி தண்ணீரில் விழுந்து விட்டாள். கூட வந்திருந்த அதே கம்மா (பாட்டி) "அல்லாஹ்வே! எம்புள்ளே தண்ணிலே விழுந்துட்டே!" - என்று சத்தமிட மரத்தின் மேலிருந்த அவன் சட்டென நீரில் குதித்து அந்த சிறுமியை தூக்கி அந்தக் கம்மா (பாட்டி) யிடம் ஒப்படைத்தான். ஆறுவயது சிறுமியின் கண்களில் கண்ட நன்றிப் பார்வையை பரிசாக பெற்று நகர்ந்தான் ..

பத்தொம்பது வயசுலேயே நல்ல வேலை நல்ல சம்பளம் என்றிருந்தவனுக்கு தந்தை பெண் பார்க்க தொடங்கிவிட்டார்.

"இப்ப என்ன அவசரம்?" - என தாயார் சொல்ல, "எம் புள்ளைய பத்தி எனக்கு தெரியும் கல்யாணம் ஆனானும் அவன் கடமைகளை சரி வர செய்வான்” - என மகனின் மேல் உள்ள முழு நம்பிக்கையோடு சொல்லிட்டார்.

பல இடங்களில் கேட்டு வந்தார்கள்.

இவனுக்கு எதிலும் சரியான நாட்டமில்லை.

இறுதியா “தீவு தெரு,அப்துல்லா தங்கை பொண்ணு பத்தாம் கிளாஸ் படிக்குது. +2 முடித்ததும் கல்யாணம் வச்சிகிறலாம்னு சொல்லுறாங்க உன் பதில் என்ன?”

- வாப்பா போனில் கேட்ட போது “சரி வாப்பா, உங்களுக்கும் உம்மாக்கும் பிடிச்சி இருந்தால் முடிவு பண்ணுங்க” என ஒரு வரி பதில் சொல்லி முடித்தான்.

முகம் பார்க்காமலே, குறைந்தபட்சம் ஒரு போட்டோ கூட பார்க்காமலே நிச்சயமாயிற்று. (அப்புறம் போட்டோ கேட்டதற்கு அவளின் மூன்றை வயசில் எடுத்த போட்டோ ஓன்று தரப்பட்டது)

இரண்டு வருஷம் கழித்து 1985, செப்டம்பர் 12-ம் தேதி வியாழக்கிழமை காலை கல்யாணம். அப்போதும் சரி வர பெண்ணை பார்க்க முடியலே. பூவும், முக்காடும் முகத்தை மறைத்து இம்சை படுத்தியது. இரவு தாலி கட்டு, ஒட்டுப்பணம், பல்லாங்குழி என குடும்பத்தார் முன்னிலையில் கலகலப்பாக நிகழ்வுகள்.

“அவ பொறந்த அன்னிக்கே வந்து மொத மொத அவளை மோந்துட்டு போனவருலோ அவரு! அல்லாஹ் இவ பொறந்த அன்னிக்கே மாப்பிளையை கண்ணுலே காமிச்சிட்டான்”

அந்த (கம்மா) பாட்டியம்மா பெருமையோடு சத்தமா சொன்ன போது, இவனும் பக்கமா அமர்ந்திருந்த பெண்ணை திருப்பி பார்க்க... ஆஹா..! அதே கண்கள்!“

அந்த அவன் நான்தான்.. வாழ்க்கைத் துணையுடன் இணைந்து இன்றுடன் வருடங்கள் முப்பத்திரண்டு.

"யப்பு ...நாங்க பொறந்த உடனே பொண்ணை பார்த்தவைங்க...."

Read More

சிறப்புக் கட்டுரை: ஹஜ் வரலாற்றில் மறக்க முடியாத ஒரு பெண்மணி!

ஒற்றை வரியில் இறைவனுக்கு அடிபணிவதில், அவனது கட்டளைகளை சிரமேற்கொண்டு நிறைவேற்றுவதில், தந்தையை மிஞ்சிய தனயனாக வரலாற்றில் உயர்ந்து நிற்கிறார் இஸ்மாயீல் நபி. அந்த திருப்பலி தடுக்கப்படுகிறது. வரலாற்றில் மனித பலிகள் தடுக்கப்பட்டு, அந்த நிகழ்வை நினைவுறுத்தும்விதமாக நினைவூட்டல் பலிகளாகவே கால்நடைகள் பலியிடும் சம்பவம் வழிகாட்டப்படுகிறது >>> இக்வான் அமீர் <<<

''''''''''''''''''''''''''''''''''''''''''''''''''''''''''

ஈகைத்திருநாள் எனப்படும் ரமலானைப் போலவே ஒரு சிறப்பு மிக்க மகத்தான நாள்தான் தியாகத்திருநாள். ‘ஈதுல் ளுஹா’ எனப்படும் இந்நாள், அன்றாட சொல்வழக்கில், ‘ஹஜ் பெருநாள்’ என்றும், ‘பக்ரீத்’ என்றும் அழைக்கப்படுகிறது. இந்த திருநாளில் பொங்கி பிராவகமெடுக்கும் மகிச்சிக்கும், கொண்டாடங்களுக்கும் பின்புலமாக திகழ்கிற தியாகமும், அர்ப்பணிப்புகளும் அளவற்றவை. மகத்தானவை. ஒவ்வொரு கதாபாத்திரமாக எழும் வரலாற்று நாயகர்களின் சம்பவங்களும் உணர்வுபூர்வமானவை. கஅபாவை தரிசிக்கச் செல்லும் ஹாஜிகள் எனப்படும் புனித பயணிகளால் இன்றளவும் மேற்கொள்ளப்படும் நிகழ்வுகளாக இருப்பவை.

தியாகத்திருநாள் என்று விளிக்கப்படும் போதெல்லாம் சிறப்பு மிக்க ஹஜ் எனப்படும் புனிதப் பயண நிகழ்வு நினைவில் எழுகிறது. புனித பயணிகளின் ஓர் இறை கேந்திரமான புனித மக்காவும், உலக இறைநம்பிக்கையாளர்களின் முன்னுதாரணமாக திகழும் பெருமதிப்புக்குரிய இப்ராஹீம் (ஆப்ரஹாம்) நபியும் அவர்களின் அழகிய குடும்பத்தினருக்கும் நினைவில் எழுகின்றனர். “நீங்கள் ஒருமனப்பட்ட இப்ராஹீமின் வழிமுறையையைப் பின்பற்றுங்கள்” - என்று திருக்குர்ஆனும் அந்த ஆளுமையைச் சிறப்பிக்கின்றது.

அதனால், தியாகத்திருநாளில் இப்ராஹீம் நபியின் தியாகங்களை நினைவுகூறாமல் யாரும் கடந்துவிட முடியாது. இறைவனுக்காகவும், அவனது திருப்பொருத்தத்துக்காகவும் வீடு, வாசல், சொந்த, பந்தங்கள், மனைவி, மக்கள் என்று அனைத்தையும் அர்ப்பணம் செய்தவர் அவர். இறைவனின் திருப்தி மட்டுமே தனது மூச்சாக கொண்டவர். “அகிலமனைத்தின் அதிபதிக்கு நான் முற்றிலும் அடிபணிந்துவிட்டவன்!” என்று பறைச்சாற்றியவர்.

அடுத்ததாக, தியாகத்தில் விண்ணளாவி நிற்கும் இதே குடும்பத்து உறுப்பினரான இப்ராஹீம் நபியின் மைந்தர் இஸ்மாயீல் நபி.

இறைவனின் கட்டளைகளை சிரமேற்கொண்டு தள்ளாத வயதில் பெயர் சொல்லக் கிடைத்த ஒரு சந்ததியையையும் இழக்கத் தயாரான இப்ராஹீம் நபி, தனது மகனை திருப்பலி மேடையில் ஏற்றுவதாக கனவு கண்டவர். அவர் தனது உணர்வுகளை உள்ளடக்கிக் கொண்டு கனத்த மனத்தவராக, தட்டுத்தடுமாறி, தனது மகனிடம் மேற்கொள்ளும் உணர்ச்சி மிக்க உரையாடலை, அந்த நிகழ்வை திருக்குர்ஆன் இப்படி வர்ணிக்கிறது:

“அன்பு மகனே, நான் உன்னை பலியிடுவதாக ஒரு கனவு கண்டேன். இது குறித்து உனது கருத்து என்ன?” – என்று இப்ராஹீம் நபிகளார் மகனிடம் கேட்டபோது, “அருமை தந்தையே! உங்களுக்கு என்ன கட்டளை இடப்பட்டிருக்கிறதோ அதையே செய்யுங்கள். இறைவன் நாடினால், என்னைப் பொறுமையாளர்களில் ஒருவனாகக் காண்பீர்கள்!”

ஒற்றை வரியில் இறைவனுக்கு அடிபணிவதில், அவனது கட்டளைகளை சிரமேற்கொண்டு நிறைவேற்றுவதில், தந்தையை மிஞ்சிய தனயனாக வரலாற்றில் உயர்ந்து நிற்கிறார் இஸ்மாயீல் நபி. அந்த திருப்பலி தடுக்கப்படுகிறது.

வரலாற்றில் மனித பலிகள் தடுக்கப்பட்டு, அந்த நிகழ்வை நினைவுறுத்தும்விதமாக நினைவூட்டல் பலிகளாகவே கால்நடைகள் பலியிடும் சம்பவம் வழிகாட்டப்படுகிறது.

இப்ராஹீம், இஸ்மாயீல் என்ற மகத்தான நபிமார்களைக் கடந்து வரலாற்றில் உயர்ந்து நிற்கும் மற்றொரு பெயர், இந்த நன்னாளில் மறக்கவே முடியாத பெயர் இப்ராஹீம் நபியின் மனைவியான ஹாஜிரா. இந்த அம்மையாரின் தியாகம் கணவரையும், மகனையும் விஞ்சி நிற்பது.

இறைக்கட்டளையால் திக்கற்ற நிலையில் பாலைவனத்தில் பரிதவித்து நின்ற வரலாற்று நாயகி இவர். கையில் பச்சிளங்குழந்தையோடு (இஸ்மாயீல்) இறையருள் என்ற ஒற்றை ஆதரவு வேறின்றி தவித்து நின்றவர். கொடுக்க பால் இன்றி அழுதழுது நின்ற குழந்தையின் தாகம் தீர்க்க ஒரே ஒரு சொட்டு குடிநீராவது கிடைக்காதா என்று சபா, மர்வா மலைகளுக்கிடையே ஓடோடி தவித்தவர். அந்த அபலைப் பெண்மணியின் தவிப்பும், அலைக்கழிப்பும் இறைவனின் பேரருளுக்கு ஆளாகிறது. தாகத்தால், அழுது புரண்டு கொண்டிருந்த குழந்தையின் காலடியிலேயே ஜம்.. ஜம் என்ற வற்றாத நீரூற்றாய் பெருக்கெடுக்கிறது. ஆயிரக்கணக்கான ஆண்டுகளையும் தாண்டி லட்சக்கணக்கான ஹஜ் புனித பயணிகளின் தாகம் தீர்க்ககும் அற்புத நீரூற்றைப் பெற்றுத் தந்த அம்மையார் ஹாஜிரா. ‘ஜம் ஜம்’ நீரூற்றின் ஒவ்வொரு துளி நீரிலும் அந்த அம்மையாரின் தவிப்பை இன்றளவும் புனித பயணிகள் உணர்வது தவிர்க்க இயலாதது.

ஹாஜிரா அம்மையாரின் தவிப்பை வெளிப்படுத்தும் விதமாகவே, துல்ஹஜ் மாதத்தில் மேற்கொள்ளப்படும் கஅபாவை சந்திக்கும் ஹஜ் பயணத்திலும் அல்லது பிற காலங்களில் மேற்கொள்ளப்படும் உம்ராவிலும், சபா, மர்வா மலைகளுக்கிடையே ஹாஜிரா அம்மையாரின் தியாக வரலாற்றை நினைவுறுத்தும் விதமாக புனித பயணிகள், ‘ஸயீ’ எனப்படும் தொங்கோட்டம் ஓடுகிறார்கள்.

“எங்கள் இறைவனே..! எங்கள் குற்றங்குறைகளை மன்னித்தருள்வாயாக! எங்களிடம் உள்ள தீமைகளை அகற்றுவாயாக..! எங்களை நல்லவர்களுடன் மரணிக்கச் செய்வாயாக..! தூதர்களின் வாயிலாக நீ அளித்த வாக்குறுதிகளை நிறைவேற்றித் தந்தருள்வாயாக..! மேலும், மறுமை நாளில் எங்களைக் கேவலப்படுத்தி விடாதே..! திண்ணமாக நீ வாக்குறுதி மீறாதவன் ஆவாய்..!” – என்று இறைநம்பிக்கையாளர்களின் பிரார்த்தனைக்கு இறைவன் இப்படி பதில் அளிப்பதை திருக்குர்ஆன் எடுத்துரைக்கிறது:

“உங்களில் எவருடைய நற்செயலையும் நான் வீணாக்க மாட்டேன். அவர் ஆணாயினும் சரி.. பெண்ணாயினும் சரியே! நீங்கள் ஒருவர் மற்றொருவரிடமிருந்து தோன்றிய ஒரே இனத்தவரே!”

இந்த நல்லுரைகள் ஹாஜிரா அம்மையாரின் தியாகத்துக்கும், பெண்ணினத்துக்கும் இறைவன் தரப்பிலிருந்து கிடைக்கும் ‘சமத்துவ’ சிறப்பாகும்.

(இந்தக் கட்டுரையின் முக்கியப் பகுதி 07.09.2017 அன்றைய தி இந்து ஆனந்த ஜோதியில் வெளியானது)

Read More

தியாகத் திருநாள் சிறப்புக் கட்டுரை: இப்ராஹீம் நபியின் பிரார்த்தனை

மனித இனத்தை நெறிப்படுத்த வேண்டிய கடினமான பணி அது. அதுவரையிலான பண்பாடுகள் தோல்வியுற்ற நிலையில் இந்தப் பணியை கையிலெடுக்க வேண்டிய நிலை. இந்த தோல்விகளிலிருந்து படிப்பினைப் பெற்று பற்பல தலைமுறைகளைத் தாண்டி அதுவரையும் நிலவி வந்த ஒழுக்கச் சீர்கேடுகளின் சாயலே இல்லாத முற்றிலும் புத்தம் புதிய உயரிய நிலையுடைய பண்பாட்டைத் தோற்றுவித்தலுக்கான இடைவெளிதான் இந்த நீண்ட நெடிய 2500 ஆண்டுகள். >>> இக்வான் அமீர்

''''''''''''''''''''''''''''''''''''''''''''''''

“இப்ராஹீம் நபியின் பிரார்த்தனை விளைவாக பிறந்தவன்தான் நான்!” என்கிறார் ஒருமுறை நபிகளார்.

“எங்கள் இறைவனே! எங்கள் இருவரையும், உனக்கு முற்றிலும் வழிபடுபவர்களாக ஆக்கி வைப்பாயாக! எங்கள் வழித்தோன்றல்களிலிருந்து முற்றிலும் உனக்குக் கீழ்ப்படிந்து வாழும் ஒரு சமூகத்தைத் தோற்றுவிப்பாயாக! மேலும், இந்த மக்களுக்காக இவர்களிலிருந்தே ஒரு தூதரை தேர்ந்தெடுப்பாயாக! அவர் உன்னுடைய வசனங்களை மக்களுக்கு ஓதிக் காட்டுபவராகவும், வேதத்தையும், ஞானத்தையும் கற்றுக் கொடுப்பவராகவும், அவர்களை தூய்மைப்படுத்து பவராகவும் திகழச் செய்வாயாக”. இப்ராஹீம் நபி மற்றும் அவரது மகன் இஸ்மாயில் செய்த பிரார்த்தனை இது.

இந்தப் பிரார்த்தனைக்கும், நபிகளாரின் வருகைக்கும் இடைப்பட்ட காலம் சுமார் இரண்டாயிரத்து ஐநூறு ஆண்டுகள். புத்தம்புதிய சமூக அமைப்பொன்றை நிர்ணயிக்கவே இந்த நீண்ட நெடிய காலத்தை இறைவன் நிர்ணயித்தான்.

இறைவனின் திட்டப்படி இப்ராஹீம் நபி, நாகரீகத்தின் தொட்டிலாக இருந்த ஈராக்கிலிருந்து புலம்பெயர்ந்து மனித சஞ்சாரமேயற்ற ஒரு புற்பூண்டும் முளைக்காத, உலகின் மொத்தப் பகுதிகளோடும் துண்டிக்கப்பட்ட அரபு நாட்டின் பகுதியான பாலை நிலப்பரப்பில் மனைவி, மக்களான ஹாஜிரா இஸ்மாயீலோடு குடியேறினார்.

2500 ஆண்டுகள் இடைவெளி

மனித இனத்தை நெறிப்படுத்த வேண்டிய கடினமான பணி அது. அதுவரையிலான பண்பாடுகள் தோல்வியுற்ற நிலையில் இந்தப் பணியை கையிலெடுக்க வேண்டிய நிலை. இந்த தோல்விகளிலிருந்து படிப்பினைப் பெற்று பற்பல தலைமுறைகளைத் தாண்டி அதுவரையும் நிலவி வந்த ஒழுக்கச் சீர்கேடுகளின் சாயலே இல்லாத முற்றிலும் புத்தம் புதிய உயரிய நிலையுடைய பண்பாட்டைத் தோற்றுவித்தலுக்கான இடைவெளிதான் இந்த நீண்ட நெடிய 2500 ஆண்டுகள்.

இப்ராஹீம் நபி பாலையில் கால் வைத்தபோது, காய்ந்த சருகுகள், தீய்ந்த தாவரங்கள் தவிர அவரை கைநீட்டி வரவேற்க வேறு ஆளில்லை. அந்த மாபெரும் இறைத்தூதரையும் அவரது குடும்பத்தாரையும் வரவேற்க அங்கு யாருமேயில்லை. தாகித்த பாலகனுக்கு நீருட்ட அன்னை ஹாஜிரா சபா, மர்வா மலைக்குன்றுகளுக்கு இடையே ஓடியோடி நீர்தேடி களைத்து நின்ற துயரச்சம்பவம் நடந்த இடம் அதுதான். கடைசியில், குழந்தை இஸ்மாயீலின் கை,கால்பட்டு வற்றாத ஜம், ஜம் நீரூற்று பீரிட்டது. இதுவரையிலும் அந்த அற்புத நீரூற்று லட்சபோப லட்சம் மக்களின் தாகத்தைத் தணித்துக் கொண்டிருக்கிறது.

சொந்தபந்தங்கள், நாடு, நகரம் என்று அனைத்தையும் இழந்து பாலைவெளியில் குடியேறிய இப்ராஹீம் நபிக்கு முதுமையில் பெயர் சொல்ல பிறந்த இஸ்மாயீல் சிறுவனானபோது, மீண்டும் ஒரு சோதனை வந்தது. குழந்தையையே பலிகேட்டு வந்த சோதனை கடைசியில் பதிலியாக வந்த ஆடால் தீர்க்கப்பட்டது.

இளைஞர் இஸ்மாயீல் வளர்ந்து ஜம், ஜம் நீரூற்று பெருக்கெடுத்த பகுதியிலேயே ஜுர்ஹும் கோத்திரத்துப் பெண்ணை மணந்து நிரந்தரமாக தங்கிவிட்டார். அரேபிய பாலைவனத்தில் இஸ்மாயீலின் சந்ததிகள் இப்படிதான் பல்கிப் பெருகினர்.

பண்பாளர் பிறந்தார்

இப்ராஹீம் நபியின் பிரார்த்தனை அங்கீகரிக்கப்பட்ட நேரம் அது. மக்காவின் பனு ஹாஷிம் கோத்திரத்தைச் சேர்ந்த வஹப் இப்னு அப்து மனாப்பின் மகளான ஆமினாவின் வயிற்றில் குழந்தை முஹம்மது சூல் கொண்ட அருளுக்குரிய தருணம். மாய, மந்திர அற்புதங்கள் ஏதும் நிகழ்த்தாமல் உலகைப் புரட்டிப்போடும் ஒரு மாபெரும் பணிக்காக “அல்முருஅ” என்ற அடைமொழியால் குழந்தை முஹம்மது அடையாளப்படுத்தப்பட்டது. மிக உயரிய பண்பாளரை அரபு நாட்டினர் குறிக்கும் விளிப்பு இது.

இப்ராஹீம் நபியின் பிரார்த்தனையாக முஹம்மது நபிகளார் (ஸல்) ஜனித்தார். தமது வாழ்நாளுக்குப் பின்னாலும் மனித இனத்துக்கான சீர்த்திருத்தம் என்ற அந்த அரும்பணியை தாங்கிச் செல்லும், தோழர், தோழியர் கொண்ட தோழமைக் குழுவினரை நபிகளார் உருவாக்கினார்.

ஆரம்பத்தில் மிகவும் சொற்ப எண்ணிக்கையிலிருந்த இவர்கள்தான் முழு அரபுலகின் பிரதிநிதிகளாக விளங்கினார்கள். நபிகளாரின் வாழ்வியல் சீர்த்திருத்த அரும்பணிக்காக அனைத்தையும் இழக்க முன்வந்தார்கள். “எங்கள் திருத்தூதர் பாதங்களில் ஒரு சிறுமுள் தைக்கவும் அனுமதியோம்!” என்று தங்கள் உயிரை அர்ப்பணிக்கவும் தயாரானார்கள்.

நபிகளாரின் லட்சிய சமூகத்தின் குழிக்கற்களானார்கள்.

(தி  இந்து, ஆனந்த ஜோதியில் - 15.09.2016 அன்று பிரசுரமான எனது கட்டுரை) 

 

Read More

குர்மீத் ராம் ரஹீம் சிங்குக்கு ஒரு மடல்: கொஞ்சம் அழுகையை நிறுத்துங்கள் குர்மீத் சிங்

அசைக்க முடியாத உங்கள் செல்வாக்கு, சங்பரிவார் அமைப்பை செயலிழக்கச் செய்தது. அதன் அரசியல் பிரிவு பாஜக ஹரியாணாவில் முற்றிலும் செயலிழந்து போனது. லட்சக்கணக்கான உங்கள் அபிமானத்துக்குரிய வன்முறையாளார்கள் வீதிகள் இறங்கி பேயாட்டம் போட்டனர். அப்பாவி மனித உயிர்களைப் பறித்தனர். விலைமதிப்பற்ற நாட்டின் பொருளாதாரத்தை சூறையாடினர். தீக்கிரையாக்கினர். சட்டம், ஒழுங்கு முற்றிலும் செயலிழந்து போன நேரம் அது... ஒரு குஜராத்தைப் போல..! >>> இக்வான் அமீர் <<<

'''''''''''''''''''''''''''''''''''''''''''''''''''''''''''''''''''''''''''''''''''''''''''''''''

குர்மீத் ராம், ரஹீம் சிங்குக்கு,

முதலில் கொஞ்சம் அழுகையை நிறுத்துங்கள் குர்மீத். ஏனெனில் இறைவனின் திருசந்நிதியில் உங்கள் தவறுகளை முன்வைத்து பாவமன்னிப்பு கேட்டு அழ மிச்சம் மீதி இருக்கும் கண்ணீர் துளிகள் உங்களுக்கு உதவலாம்.

ஆஹா..! அந்தக் காட்சியை நான் என்னவென்பேன்? குறைந்தபட்ச தண்டனை வழங்கும்படி கேட்டு நீதிபதியிடம் நீங்கள் கெஞ்சியதும், சிறைவளாகத்திலேயே அமைக்கப்பட்டிருந்த தற்காலிக நீதிமன்றத்தைவிட்டு வெளியேறாமல் ஒரு குழந்தையைப் போல அடம் பிடித்து அழுததும் எப்படி மறக்க முடியும்? நீங்கள் ஒரு போலியான ஆன்மிகவாதி என்று உங்கள் முகத்திரையை விலகிய நிமிடங்கள் அல்லவா அவை..!

நீங்கள் கடவுளாகக் காட்டி அபலைப் பெண்களை உங்கள் உடற்பசிக்கு இரையாக்கிக் கொண்டது கடைசியில் 15 ஆண்டுகளுக்குப் பிறகு அம்பலப்பட்டது.

கடவுள் ஒருபோதும் பலவீனமானவர் அல்ல. குற்றம், குறையுடையோனும் அல்ல என்பதுகூட உங்களுக்கு தெரியவில்லை என்பது எவ்வளவு துரதிஷ்டம்!

ஆண்டான் வெள்ளையனின் சட்டங்களை தூக்கியெறிந்து, ஒருவேளை இந்தியாவிலுள்ள எல்லா மதநம்பிக்கையாளர்களின் சட்டங்களையும் ஒன்று திரட்டி, ஆரோக்கியமான ஒரு அமர்வில், எந்தவிதமான உள்நோக்கமும் இல்லாமல் பரிசீலித்து தொகுக்கப்படும் பொதுசிவில் சட்டம் அமலில் இருக்குமேயானால், அந்த இஸ்லாமிய சட்டத்தின் உட்பிரிவின்படி இந்நேரம் நீங்கள் உங்கள் கழுத்தைப் பறிக்கொடுக்க வேண்டியிருந்திருக்கும்.

அதனால், தப்பித்தேன் என்று கொஞ்சம் அமைதியாக இருங்கள் குர்மீத்.

உங்கள் ஆசிரமத்தின் பாதாளலோக நிலவறைக்குள் பெண் சீடர்களை மட்டுமே பாதுகாப்புப் பணிகளில் அமர்த்தி கொண்டு அவர்களின் வறுமையையும், அறியாமையையும் மூலதனமாக்கிக் கொண்டு கடவுளின் அவதாரமாக நீங்கள் அரங்கேற்றிய லீலைகளின் இரண்டு அத்தியாயங்கள் இப்போது வெளிப்பட்டுள்ளன. கிருஷ்ணர்-கோபியர் என்றும், ‘மன்னிப்பு’ என்ற பெயரிலும் நீங்கள் துகில் உரித்த பெண்களின் பட்டியல் நீண்ட, நெடியது என்பது நீங்கள் அறிவீர்கள். 15 ஆண்டுகள் நீடித்த வழக்கில் உண்மையின் வீரியம் இப்போதுதான் வெளிப்பட்டிருக்கிறது.

அசைக்க முடியாத உங்கள் செல்வாக்கு, சங்பரிவார் அமைப்பை செயலிழக்கச் செய்தது. அதன் அரசியல் பிரிவு பாஜக ஹரியாணாவில் முற்றிலும் செயலிழந்து போனது. லட்சக்கணக்கான உங்கள் அபிமானத்துக்குரிய வன்முறையாளார்கள் வீதிகள் இறங்கி பேயாட்டம் போட்டனர். அப்பாவி மனித உயிர்களைப் பறித்தனர். விலைமதிப்பற்ற நாட்டின் பொருளாதாரத்தை சூறையாடினர். தீக்கிரையாக்கினர். சட்டம், ஒழுங்கு முற்றிலும் செயலிழந்து போன நேரம் அது... ஒரு குஜராத்தைப் போல..!

கடைசியில், நீதிமன்றமே களத்தில் இறங்கி, அரசியல் ஆதாயத்துக்காக சரணாகதியா என்று ஹரியாணா மாநில பாஜக அரசை கண்டிக்க வேண்டிய ஒரு சூழலை உருவாக்கிய உங்கள் செல்வாக்கு சாதாரணமானதா குர்மீத்! இதற்கு போய் நீங்கள் அழலாமா..? 

 

 

அதிலும் மாநில பாஜக அரசு கலவரக்காரர்களை அடக்க பின்பற்றிய அணுகுமுறையில்கூட உங்கள் செல்வாக்கல்லவா வெளிப்பட்டது.

கடவுள் குர்மீத் பெயரால் நடைப்பெற்ற கலவரத்தில் 32 பேர் கொல்லப்பட்டதாக தகவல்கள். ஆனாலும் அவர்கள் அனைவரும் நமது இராணுவமும், காவல்துறையினரும் துப்பாக்கியால் சுட்டு கொல்லப்பட்டவர்கள் அல்ல!

வன்முறையாளர்களை நோக்கி திரும்ப வேண்டிய துப்பாக்கிகள் வானத்தை நோக்கியல்லவா திரும்பி சுட்டன.

கலவரத்தில் சிக்கி கொல்லப்பட்ட சாமான்ய மக்களின் உயிரிழப்புகளுக்கு காரணம் நீங்களாக இருக்க அதற்கு யார் தண்டனை தருவது குர்மீத்?

நமது மற்றுமோர் மாநில காஷ்மீர் உமர் அப்துல்லாஹ்,

ஹரியாணா வன்முறையாளர்களை இராணுவ ஜீப்பில் கட்டிவைத்து மனிதக் கேடயமாகப் பயன்படுத்திக் கலவரத்தை ஏன் அடக்கவில்லை?

கண்களைத் துளைத்து பார்வையைப் பறிக்கும் குண்டுகளை ஏன் சுடவில்லை?”

– என்றெல்லாம் கேள்வி கேட்கும் அளவுக்கு உங்கள் விசுவாசிகளிடம் பாஜக மென்மையுடன் நடந்து கொண்டது உங்களுக்குத் தெரியாதா?

அட, அதையெல்லாம் விடுங்கள்...

மனதோடு கொஞ்சம், அதுதான் மன்கீபாத்தில், நமது பிரதமர் மோடி சர்க்கார் உங்களைக் குறித்தும், உங்கள் அட்டூழியங்களைக் குறித்தும், உங்களது ஆதரவாளர்களின் வன்முறைகள் குறித்தும் ஒரு வார்த்தைக்கூட பேசவில்லையே..! ஒரு இம்மியளவும் கண்டனம் தெரிவிக்கவில்லையே இதெல்லாம் உங்கள் செல்வாக்கின்றி வேறென்ன?

ஓட்டறுவடைக்கு மனித உயிர்கள்தான் உரம் என்பது சங்பரிவார் தத்துவம் என்பதை உல்லாச லோகியான நீங்கள் அறிந்திருக்க நியாமில்லைதான்..!

சகலவசதிகளோடு கூடிய சொகுசு சிறைவாழ்க்கையில் உங்களுக்கு என்னதான் கவலையிருக்கிறது குர்மீத் சிங்?

இந்திய ஜனநாயக அமைப்பில், குற்றவாளிகள் நிரபராதிகளாவதும், நிரபராதிகள் குற்றவாளிகளாக்கப்படுவதும் சகஜம்தானே குர்மீத் சிங்?

நாட்டில் நீதிக்காக ஏங்கும் ஆயிரக்கணக்கான சங்கரராமன்களிருக்க நீங்கள் ஏன் அழுது கொண்டிருக்கிறீர்கள் குர்மீத் சிங்..?

மறதியுள்ளவர்கள் மிகைத்துப் போன நாட்டில், நீங்கள் மீண்டும் உல்லாச புரியில் உலாவர கொஞ்சம் நாளாகலாம். அதுவரை கொஞ்சம் பொறுத்திருக்கக் கூடாதா பாபா?

 

 

Read More

பாபா குர்மீத் ராம் ரஹீம் சிங்கிற்கு 20 ஆண்டுகள் சிறை தண்டனை

'''''''''''''''''''''''''''''''''''''''''''''''''''''''''''''''''''''''''''''''''

பாலியல் பலாத்கார வழக்கில் தேரா சச்சா சவுதா தலைவர் பாபா குர்மீத் ராம் ரஹீம் சிங்கிற்கு சிபிஐ நீதிமன்றம் 20 ஆண்டுகள் சிறை தண்டனையும் ரூ.30 லட்சம் அபராதமும் விதித்தது. >>> இக்வான் அமீர் <<< 

'''''''''''''''''''''''''''''''''''''''''''''''''''''''''''''''''''''''''''''''''''' 

சீக்கிய மதத்தில் ஒரு பிரிவான தேரா சச்சா சவுதாவின் தலைமை ஆசிரமம் ஹரியாணா மாநிலம் சிர்ஸாவில் உள்ளது. அங்கு தங்கியிருந்த 2 பெண் துறவிகளை அமைப்பின் தலைவர் பாபா குர்மீத் ராம் ரஹீம் சிங் பாலியல் பலாத்காரம் செய்ததாக குற்றம் சாட்டப்பட்டது.

இதுதொடர்பான வழக்கு ஹரியாணாவின் பஞ்ச்குலாவில் உள்ள சிபிஐ நீதிமன்றத்தில் நடைபெற்று வந்தது. சுமார் 15 ஆண்டுகள் நீடித்த இந்த வழக்கில் கடந்த 25-ம் தேதி தீர்ப்பு வழங்கப்பட்டது. அதில் குர்மீத் ராம் ரஹீம் சிங் குற்றவாளி என்றும் அவருக்கான தண்டனை விவரம் 28-ம் தேதி வெளியிடப்படும் என்றும் அறிவிக்கப்பட்டது. உடனடியாக அவர் கைது செய்யப்பட்டு ரோட்டக் சிறையில் அடைக்கப்பட்டார்.

குர்மீத் ராம் ரஹீம் சிங் வழக்கைத் தொடர்ந்து நடைபெற்ற சம்பவங்கள் இவை:

• தேரா சச்சா சவுதா ஆதரவாளர்கள் ஹரியாணா, பஞ்சாப், டெல்லியில் பெரும் கலவரத்தில் ஈடுபட்டனர்.

• தீர்ப்பு அறிவிக்கப்பட்ட பஞ்ச்குலா நீதிமன்ற வளாகம் முன்பு குவிந்திருந்த ஒரு லட்சத்துக்கும் மேற்பட்ட தேரா சச்சா ஆதரவாளர்கள் அந்த நகரை சூறையாடினர். அரசு, தனியார் கட்டிங்களையும் வாகனங்களையும் தீ வைத்து கொளுத்தினர்

• தேரா சச்சா சவுதா தலைமை ஆசிரமம் அமைந்துள்ள சிர்ஸா நகரிலும் மிகப்பெரிய அளவில் கலவரம் வெடித்தது.

• பஞ்ச்குலாவில் 30 பேரும் சிர்ஸாவில் 8 பேரும் உயிரிழந்தனர். 250-க்கும் மேற்பட்டோர் படுகாயம் அடைந்தனர்.

• இந்த கலவரத்தைத் தொடர்ந்து ஹரியாணாவில் சிர்ஸா ஆசிரமம் உட்பட பல பகுதிகளில் ராணுவ வீரர்கள் குவிக்கப்பட்டனர்.

• பாதுகாப்பு கருதி பஞ்ச்குலா சிபிஐ நீதிமன்றம் தற்காலிகமாக ரோட்டக் சிறைக்கு மாற்றப்பட்டது.

• நீதிபதி ஜெகதீப் சிங் நேற்று ஹெலிகாப்டர் மூலம் அந்த சிறைக்கு சென்றார். தண்டனை விவரம் தொடர்பாக சிபிஐ மற்றும் பாபா தரப்பினர் தங்கள் வாதங்களை எடுத்துரைக்க தலா 10 நிமிடங்கள் வழங்கப்பட்டது.

• இந்த பாலியல் வழக்கு அரிதினும் அரிதான வழக்கு என்பதால் பாபா குர்மீத் ராம் ரஹீம் சிங்கிற்கு ஆயுள் தண்டனை வழங்க வேண்டும் என்று சிபிஐ வலியுறுத்தியது.

• பாபா தரப்பில் ஆஜரான வழக்கறிஞர், பாபாவின் உடல் நிலை, வயது, சமூக சேவைகளைக் கருத்தில் கொண்டு அவருக்கு குறைந்தபட்ச தண்டனை வழங்க வேண்டுகோள் விடுத்தார்.

• இருதரப்பு வாதங்களையும் கேட்ட நீதிபதி ஜெகதீப் சிங், பாபா குர்மீத் ராம் ரஹீம் சிங்கிற்கு 20 ஆண்டுகள் சிறை தண்டனையும் ரூ.30 லட்சம் அபராதமும் விதித்தார்.

• இரண்டு பலாத்கார வழக்குகள் என்பதால் ஒவ்வொரு வழக்கிற்கும் தலா 10 ஆண்டுகள் சிறை தண்டனை விதிக்கப்பட்டது. ரூ.30 லட்சம் அபராதமும் விதிக்கப்பட்டது.

• இந்தத் தொகையில் பாதிக்கப்பட்ட பெண்களுக்கு தலா ரூ.14 லட்சம் இழப்பீடு வழங்கப்படும்.

இந்திய வரலாற்றில் மிக முக்கியமான தீர்ப்பு இது. ஆயினும் இந்த தீர்ப்பின் நிலைத்த தன்மையும், அரசியல் தலையீடுகளின் வன்மையும், போகப் போகத்தான் தெரியவரும்.

Read More