அழைப்பது நம் கடமை: 15, 'கொந்தளிப்புக்குப் பின்தான் பேரமைதி!'

விமர்சனங்களுக்கு ஈடு கொடுக்கும் ஒன்றுதான் வரலாற்றில் நிலைத்து நிற்கும். அந்த வகையில் சமீபகாலமாக விமர்சனங்களுக்கும், ஏராளமான கேள்விகளுக்கும் ஆளாகிவரும் மார்க்கம் இஸ்லாம். அதுவும் செப்.11 இரட்டை கோபுரங்கள் தகர்க்கப்பட்ட சம்பவத்துக்குப் பிறகு இந்த நிலை தீவரமடைந்தது. தற்போது சகோதரி ரிஸானா தண்டனைவரை அது தொடர்கிறது.

இந்த விமர்சனங்களால் இரண்டுவிதமான நன்மைகள் கிடைத்தன. முதலாவது, இஸ்லாம் சம்பந்தமாக சரியான விளக்கத்தை அடுத்தவர்க்கு எடுத்து வைக்கக் கிடைத்திருக்கும் வாய்ப்பு. அடுத்தது, இஸ்லாம் சம்பந்தமான கருத்துக்களை சுயமாக  ஆய்வு செய்து அறிவு வளர்த்துக் கொள்ள கிடைத்த வாய்ப்பு.

ஆப்கானிஸ்தான் முதற்கொண்டு இராக் வரையிலான இன்றைய சம்பவங்கள் சகிக்கும்படியாக இல்லை. இறைவன் மகா வல்லமையுள்ளவன்! அல்லாஹீ அக்பர்! - என்ற அற்புதமான தத்துவார்த்த முழக்கம் அப்பாவிகளைக் கொல்ல.. தலைகளை வெட்ட பயன்படுத்தப்படுகிறது. இந்தக் காட்டுமிராண்டித்தனங்களை சகித்துக் கொள்ள இயலவில்லை.

சக உயிர்களிடம் பேரன்புடன் இருக்கும்படி வழிகாட்டியுள்ள மார்க்கம் இஸ்லாம். சக உயிர்களின் உரிமைகளைப் பேணும்படி இறைநம்பிக்கையோடு முடிச்சுப் போட்டிருக்கும் மார்க்கம் இஸ்லாம். அப்படிப்பட்ட உயரிய மார்க்கத்தைப் பின்பற்றுவதாக சொல்லிக் கொள்பவர்கள் நடந்துகொள்ளும் முறை உண்மைதானா? என்று பலத்த சந்தேகங்களை எழுப்புகிறது.

உணர்ச்சிமயமான கொந்தளிப்புகள், அவரவர் நாட்டுக்குரிய பிரச்சினைகள், அதன் அடிப்படையில் அந்த நாட்டு மக்கள் எடுக்கும் முடிவுகள், உலகளவில் ஒட்டு மொத்தமாக முஸ்லிம் நாடுகளில் காணப்படும் இஸ்லாமிய சிந்தனா வரட்சி! மிகைத்தவிட்ட உலகாயதப்போக்கு இவை எல்லாம் நடப்பு சம்பவங்களின் பின்புலன்கள் என்பது உண்மைத்தான்! ஆனால், அதற்காக எடுக்கப்படும் நடவடிக்கைகள் ஒருகாலும் அனுமதிக்க முடியாது.

கடும் உஷ்ணமாய் இறங்கிக் கொண்டிருக்கும் நடப்பு யதார்த்தங்களை எல்லாம் உள்வாங்கி தனது அழைப்பியல் களத்தில் நிலைத்திருக்க வேண்டியது அழைப்பாளனின் தனித்திறமையாகும்.

ஆக்கிரமிப்புகள், சிறைக்கொடுமைகள், சித்திரவதைகள், பாலியல் வன்கொடுமைகள் என்று அமெரிக்க, பிரிட்டன் வினைகளுக்கு...

ஆள் கடத்தல்கள், தலைவெட்டல்கள். சிறைபிடிப்புகள், பணயக் கைதிகள் என்று எழும் எதிர்வினைகளை இஸ்லாத்தின் ஒளியில் பொறுத்துக் கொள்ள முடியாது.

இவற்றுக்கிடையே மேற்கத்திய ஊடகங்கள், போலி-பொய்மைக் கலந்த செய்தி சித்தரிப்புகள், கருத்துருவாக்கங்கள் என்று ஏகத்துக்கும் பிரச்சினைகள் மலை.. மலையாய் தலையே வெடிக்கும் அளவுக்கு கனக்கிறது. இஸ்லாம் வீறு கொண்டு எழுந்த அரபு மண்ணின் ஆட்சியாளர்களோ ஆட்சி, அதிகாரம், உலக போகங்கள் ஒன்றே குறியாய் மறுமையை தொலைத்துக் கொண்டிருக்கிறார்கள்.

இதை எல்லாம் கண்டு அழைப்பாளர் கலங்கிடக் கூடாது.

கடல் கொந்தளிப்புக்கு பின்தான் பேரமைதி என்பதே இயற்கையின் நியதி. சமுத்திரக் கொந்தளிப்பும், புயல் காற்றின் ஆர்ப்பரிப்பும் மீனவனைத் துளியும் பாதிப்பதில்லை. ஏனென்றால்... இவற்றுக்குப் பின்னே ஏற்படும் அமைதியில் ஏராளமான பலன் பெறலாம்.. வலை வலையாய் மீன்களை வேட்டையாடலாம் என்பது அனுபவம் போதிக்கும் உண்மை. இதை உணர்ந்தவனாதலால் இந்த மௌனநிலை அவனுக்கு சாத்தியமாகிறது. மக்கள் மனங்கள் என்னும் மீன்களைப் பிடிக்க இருக்கும் அழைப்பாளர்கள் ஒரு வகையில் சிறந்த மீன்பிடித் திறன் மிக்க மீனவர்களாய் தங்களை உருமாற்றிக் கொள்ள வேண்டும். மனித மனங்கள் என்னும் மீன்களைப் பிடிப்பவர்கள் அவர்கள்.

-- இறைவன் நாடினால்... அழைப்பது தொடரும். 

Read More

இஸ்லாம் வாழ்வியல்: பாதி பேரீத்தம் பழமாவது தர்மம் செய்யுங்கள்!

பகல் முழுவதும் நோன்பு, இரவுகளில் பிரத்யேகத் தொழுகைகள் என்று சுழற்சியான ஓர் அற்புதமான சூழல் கொண்ட மாதம் ரமலான். பகலில் பசி, தாகம் மற்றும் உடல் இச்சைகளிலிருந்து விலகி இருந்தும், இரவில் பிரத்யேக தொழுகை, திருக்குா்ஆன் வாசிப்பு மற்றும் உபரி இறை வணக்கங்கள் என்று படைத்தவனை சரணடைவதற்கு பள்ளிவாசல்கள் நிரம்பிவழியும் மாதம். அதேபோல, தான தர்மங்கள், தேவையுள்ளோர்க்கு உதவிகள் என்று உள்ளம் ஈந்து கனியும் காலம் இது.

பசித்திருப்பதும், விழித்திருப்பதும், இறைவணக்கம் என்பது போலவே, தேவையுள்ளோரின் தேவைகளை நிறைவேற்றுவதும் இறைவனின் திருப்பொருத்தத்தை நாடி பொருளால் செய்யும் இறைவணக்கமாகும்.

தான, தர்மங்களின் சிறப்புகளை எடுத்துரைக்கும் விதமாக ஒருமுறை நபிகளார் இப்படி அறிவுறுத்துகிறார்:

”மறுமையில், உங்கள் ஒவ்வொருவரிடமும் இறைவன் நேரடியாக பேசி, கணக்கு வாங்குவான். அங்கு பரிந்துரை செய்பவர் ஒருவரும் இருக்க மாட்டார். அவனை மறைத்துக் கொள்ளும் திரை எதுவும் இருக்காது. அங்கே மனிதன் தனக்கு பரிந்துரை செய்பவர் அல்லது உதவுபவர் எவராவது தென்படுகின்றாரா என்று தனது வலது பக்கம் திரும்பிப் பார்ப்பான். அந்தோ..! அங்கே அவனது செயல்களைத் தவிர வேறு எதுவும் தொியாது. பிறகு இடது பக்கம் திரும்பிப் பார்ப்பான். அங்கும் அவனது செயல்களைத் தவிர வேறு எதுவும் தென்படாது. பின்னர், முன் பக்கம் பார்வையைச் செலுத்துவான். அங்கும் அவனுக்கே உரிய பயங்கரங்கள் நரக வடிவில் காத்திருப்பதை காண்பான். எனவே, மக்களே! பாதியளவு பேரீத்தம் பழத்தையாவது தருமம் செய்து நீங்கள் நரக நெருப்பிலிருந்து தப்பித்துக் கொள்ள முயலுங்கள்!”

இறைநம்பிக்கையாளர்கள் தமது செயல்களுக்கான நற்கூலியை இறைவனிடம் மட்டுமே எதிர்பார்த்து செயல்படுபவர்கள். இந்த உயர் பண்பை அவர்களின் வாய்மொழியாலேயே, திருக்குர்ஆன் இப்படி வர்ணிக்கிறது:

”நாங்கள் இறைவனுக்காகவே உங்களுக்கு உணவளிக்கின்றோம். நாங்கள் உங்களிடம் இதற்கான எந்தப் பிரதிபலனையும், நன்றியையும் எதிர்பார்க்கவில்லை!”

பகட்டுக்காகவும், பிறருக்கு காண்பிக்க வேண்டும் என்பதற்காக செய்யப்படும் எந்தவொரு செயலும் அவர்களின் நற்செயல்களை பாழாக்கிவிடும்.

•   தேவையுள்ளோருக்காக, இறைவழியில் தான, தர்மங்கள் செய்த பின்னர் அதை சுட்டிக் காட்டக் கூடாது.
•    உதவிகள் பெற்றவரின் உள்ளம் புண்படும்படி பேசக் கூடாது.
• தர்மம் செய்த பின்னர், தேவையுற்றோர், ஏழை, எளியோரின் சுயமரியாதை பாதிக்கும்வகையில் அவர்களுடன் இழிவாக நடந்து கொள்ள கூடாது. மேலும் அவர்களுக்கு உதவி செய்ததைச் சுட்டிக்காட்டி அவர்களின் உள்ளங்களை புண்படுத்தக் கூடாது.
•    உதவி பெற்றோர் எப்போதும். தங்களுக்கு நன்றிக்கடன் பட்டிருக்க வேண்டும், தங்கள் முன் தலைத் தாழ்த்தி நிற்க வேண்டும். தங்களை உயர்வாக கருத வேண்டும் என்று ஒருகாலும் எண்ணக் கூடாது.
•  யாசிப்போர், தேவையுடையோருடன் மென்மையாகவும், அழகிய முறையிலும் நடந்து கொள்வதோடு, அவர்களை அதட்டவோ, விரட்டவோ கூடாது.

மட்டரகமான இந்த எண்ணங்களை விட்டு இறைநம்பிக்கையாளர்கள் உள்ளத்தை தூய்மையாக வைத்திருக்க வேண்டும். இல்லையென்றால் தங்கள் தான, தருமங்கள் பாழாகிவிடும் என்று எச்சரிக்கிறது திருக்குா்ஆன்:

”மனிதர்களுக்குக் காண்பிப்பதற்காகவே தனது பொருளை செலவு செய்பவனைப் போல, நீங்களும் கொடுத்ததைச் சொல்லிக் காண்பித்தும், மனம் புண்படச் செய்தும் உங்களுடைய தான, தர்மங்களைப் பாழாக்கி விடாதீர்கள்!”

தான, தர்மங்களின் போது, ஹலாலான வழிகளில் அதாவது இஸ்லாம் அனுமதிக்கும் ஆகுமான வழிகளில் ஈட்டப்பட்ட  பொருளையே செலவழிக்க வேண்டும். தமக்கு பிடித்தமான, தாங்கள் விரும்புகின்ற உயரிய பொருள்களையே அடுத்தவர்க்கும் வழங்க வேண்டும் என்றும் திருக்குர்ஆன் அறிவுறுத்துகிறது. 

”இறைவனின் தரப்பிலிருந்து இரண்டு வானவர்கள் இறங்காமல் எந்த நாளும் கழிவதில்லை. அவர்களில் ஒருவர் தேவையுள்ளோருக்கு தாராளமாக செலவு செய்கின்ற அடியானுக்காக,  ”இறைவா! தாராள மனம் கொண்ட இந்த அடியானுக்கு தகுந்த நற்கூலியைத் தருவாயாக!” – என்று இறைஞ்சுகின்றார். அடுத்த வானவரோ, குறுகிய உள்ளம் கொண்ட கஞ்சர்களுக்காக,  ”இறைவா! கஞ்சத்தனம் புரியும் இந்த மனிதனுக்கு அழிவைத் தா!” – என்று சபிக்கிறார் என்று நபிகளார் எச்சரிக்கிறார்.

நபித்தோழர் அபூதர்தா நபிகளாருடனான தனது அனுபவம் ஒன்றை இப்படி பகிர்ந்து கொள்கிறார்:

”ஒருமுறை நான் நபிகளாரின் திருச் சமூகம் சென்றிருந்தேன். அண்ணலாரின் பார்வை என் மீது பட்டபோது, ”அவர்கள் அழிந்துவிட்டார்கள்!”- என்று கடுமையாக சொன்னார்கள். பயந்து போன நான், ”என் தந்தையும், தாயும் தங்களுக்கு அர்ப்பணமாகட்டும்! யார் அழிந்து போனார்கள் இறைவனின் திருத்தூதரே?” – என்று பதற்றத்துடன் கேட்டேன். நபிகளார் பதிலளித்தார்கள்: ”யார் செல்வந்தர்களாய் இருந்தும், செலவழிக்காமலிருந்தார்களோ அவர்கள் அழிந்துவிட்டார்கள். முன்னால் இருப்பவர்களுக்கும், பின்னால் இருப்பவர்களுக்கும், வலது பக்கம் இருப்பவர்களுக்கும் என்று எல்லோருக்கும் தங்கள் செல்வத்தை வாரி வாரி வழங்குபவர்கள் வெற்றியடைந்தவர்கள். ஆனால், தோழரே! இப்படி செலவு செய்யக் கூடிய செல்வந்தர்கள் மிகவும் குறைவாகவே உள்ளனர்!”

ரமளான் வெறும், பசியையும், உறக்கத்தையும், மன இச்சைகளையும் கட்டுப்படுத்தும் மாதமல்ல. தங்கள் பொருளால் சக மனிதர்களின் துயர்துடைக்கவும், அவர்களின் துன்பம், துயரங்களை களையவும் இறைநம்பிக்கையாளர்களுக்கு பயிற்சியளிக்கும் மாதமாகும். 

(தி இந்து நாளேட்டின், ஆனந்த ஜோதி பகுதியில் 30.06.2016 அன்று  பிரசுரமான எனது கட்டுரை)

இந்துவின் இணைப்புக்கு: http://tamil.thehindu.com/society/spirituality/%E0%AE%AA%E0%AE%BE%E0%AE%A4%E0%AE%BF-%E0%AE%AA%E0%AF%87%E0%AE%B0%E0%AF%80%E0%AE%9A%E0%AF%8D%E0%AE%9A%E0%AE%AE%E0%AF%8D-%E0%AE%AA%E0%AE%B4%E0%AE%AE%E0%AE%BE%E0%AE%B5%E0%AE%A4%E0%AF%81-%E0%AE%A4%E0%AE%B0%E0%AF%8D%E0%AE%AE%E0%AE%AE%E0%AF%8D-%E0%AE%9A%E0%AF%86%E0%AE%AF%E0%AF%8D%E0%AE%AF%E0%AF%81%E0%AE%99%E0%AF%8D%E0%AE%95%E0%AE%B3%E0%AF%8D/article8791342.ece

Read More

மாற்றான் தோட்டத்து மல்லிகை: ”கனவுகளைச் சிதைக்காதீர்!”

கடல் கடந்து வாழும் சகோதரி Geetha Mathi தனது முகநூல் பக்கத்தில் பதிவேற்றம் செய்திருந்த பதிவு இது. குழந்தைகள் பொதி சுமக்கும் குழந்தைகளாக்காமல் அவர்கள் சமூகத்தின் அற்புத சிற்பிகளாக்க வேண்டும். இளமையின் கனவுகளைச் சிதைக்காமல் வார்த்தெடுக்க வேண்டும். இது சம்பந்தமாக எனது சிறார் வலைப்பூவில் ஒரு பரிசு கதையாய் சித்தரித்துள்ளேன். இணைப்பு: http://mazalaipiriyan.blogspot.in/2012/11/blog-post_3.html அயலகத்தார் எப்படியெல்லாம் தமது சிற்பிகளை வடிவமைக்கிறார்கள்? நமது கல்விமுறை எத்தகைய மண்ணாங்கட்டிகளை, சுயநலவாதிகளை வார்த்தெடுத்து கொண்டிருக்கிறது என்ற ஒப்பீடுக்காக இந்த கட்டுரையை மாற்றான் தோட்டத்து மல்லிகை பகுதியில் மீள்பதிவு செய்கிறேன். - இக்வான் அமீர்.

''''''''''''''''''''''''''''''''''''''''''''''''''''''''''''''''''''''''''''''

Geetha Mathi

குழந்தைகள் ஒரு விளைநிலம் மாதிரி. அந்த விளைநிலத்தில் நீங்க விதவிதமான விதைகளை விதைத்துக்கொண்டே இருக்கணும். எந்த விதை பற்றிக்கொண்டு வளரத்தலைப்படுகிறதோ.. அது மென்மேலும் வளரத் துணைசெய்யணும். அதற்கு தண்ணீர் ஊற்றி வளர்க்கணும். ஒரு நிலையில் அது தானே தன்னை வளர்த்துக்கொண்டு விருட்சமாகும் என்றொரு அழகான கருத்தை நண்பர் உமாநாத் Umanath Selvan புதுயுகம் தொலைக்காட்சியில் நடைபெற்ற தந்தையர் தின நிகழ்வில் முன்வைத்தார்.

இதே கருத்தையொட்டி சில வருடங்களுக்கு முன் ஆஸ்திரேலியப் பள்ளிகள் குறித்த என் தொடரில் நான் எழுதியவற்றை இங்கு மீள்பதிவு செய்ய விரும்புகிறேன்.

உயர்நிலைக்கல்வி என்பது ஏழாம் வகுப்பிலிருந்து ஆரம்பம். மொத்தம் எட்டுப் பாடங்கள். ஆங்கிலம், கணிதம், அறிவியல் போன்ற அடிப்படைப் பாடங்களும், கலை, சமூகவியல், தொழில்நுட்பம், மொழி, சுகாதாரம் மற்றும் உடற்கல்வி போன்ற தொழிற்கல்விப் பாடங்களும் கற்றுத்தரப்படுகின்றன. ஐந்து தொழிற்கல்விப் பாடங்களிலும் பல பிரிவுகள் உண்டு. அவற்றை கீழே முதல் கமெண்டில் தந்துள்ளேன். எல்லாப் பள்ளிகளிலும் எல்லாப்பிரிவுகளும் இருக்கவேண்டிய அவசியமில்லை என்றாலும் பெரும்பாலான பள்ளிகள் பெரும்பாலான பிரிவுகளைக் கொண்டுள்ளன. ஆஸ்திரேலியாவில் பத்துக்கு ஒன்பது பள்ளிகள் இந்த முறையில்தான் கல்வியைப் போதிக்கின்றன.

ஐந்து பிரிவுகளிலிருந்தும் பிரிவுக்கு ஒன்றாக ஐந்து பாடங்களைத் தேர்ந்தெடுத்து ஆறு மாதங்கள் (ஒரு செமஸ்டர்) படிக்க வேண்டும். எதையெதைத் தேர்ந்தெடுப்பது என்பது மாணவனின் விருப்பம். அடுத்த ஆறு மாதங்களுக்கு வேறு ஐந்து பாடங்கள்.ஒருமுறை தேர்ந்தெடுத்தவற்றை மறுமுறை தேர்ந்தெடுக்க இயலாது. படிப்பு என்பது, கோட்பாடு, செய்முறை, செயலறிவு அதற்கான வாய்ப்புகள் என்று எல்லாவற்றையும் உள்ளடக்கியது. இப்படிப் படிப்பதால், பத்தாம் வகுப்பு முடித்த ஒரு மாணவனுக்கு கிட்டத்தட்ட நாற்பது வெவ்வேறு விதமான தொழிற்கல்வியில் பரிச்சயம் உண்டாகியிருக்கும்.

வெறும் ஏட்டுப்படிப்பு மட்டுமே வாழ்க்கை இல்லை என்பதை மாணவர்கள் உணர்கின்றனர். கண்முன் விரிந்திருக்கும் மாபெரும் உலகில் வாழ இத்தனை வழிகள் இருக்கின்றன என்பதையும் உணர்கின்றனர். ஒரு வேலை போனால் இன்னொன்று என்று வாழமுடியும் என்னும் நம்பிக்கை கொள்கின்றனர். வாழ வழியில்லாமல் தற்கொலை செய்துகொள்ளும் அபாயத்திலிருந்து அறிவுபூர்வமாக வெளியேறுகின்றனர். சுய விருப்பத்துடன் தங்கள் பாதையைத் தாங்களே தேர்வு செய்து மனநிறைவு பெறுகின்றனர்.

இது போன்ற வாய்ப்புகள் வழங்கப்படாதவரை ஒருவர் தன்னிடம் இருக்கும் திறமையை தானே அறிய இயலாமல் போய்விடுகிறது. இதுவரை ஒரு மாணவன் தான் படித்த பாடங்களில் பெற்ற மதிப்பெண்கள் மற்றும் ரிப்போர்ட்களின் அடிப்படையில் அவனுக்கு எதில் அதிக நாட்டம் என்பதும் எதில் அவன் முழுத்திறமையும் வெளிப்படுகிறது என்பதும் தெரியவந்திருக்கும். இந்தப் பாடங்களில் தேர்ச்சி சதவீதம் முக்கியமில்லை. மாணவர்களின் திறனைக் கண்டுபிடித்து வெளிக்கொணர்வதும், அத்திறனை மேம்படுத்த ஆலோசனை வழங்குவதுமே ஆசிரியரின் வேலை.

பத்தாம் வகுப்பில் மாணவர்களைப் பாடாய்ப் படுத்தும் பொதுத்தேர்வு இல்லை என்பதும் வியப்பான உண்மை. பத்தாம் வகுப்பு முடிந்ததும், பள்ளி மாணவர்களில் பாதிபேர் பள்ளியை விட்டு விலகுகின்றனர். ஒரு மாணவன் தன் எதிர்காலத்தை நிர்ணயிக்க வேண்டிய கட்டம் இது. படிப்பில் அதிக நாட்டமிருக்கும் பிள்ளைகள் பதினொன்றாம் பன்னிரண்டாம் வகுப்புகளுக்குத் தங்களை தயார் செய்து கொள்ள, தொழிற்கல்வியில் நாட்டமிருக்கும் பிள்ளைகள் பள்ளியை விட்டு விலகி, தொழிற்கல்விக் கூடத்தை நாடுகின்றனர். அதனால் மேற்படிப்பான மருத்துவம், பொறியியல் போன்றத் துறைகளில் தேவையற்ற போட்டிகள் தவிர்க்கப்படுகின்றன.

தொழிற்பயிற்சிக் கூடத்துக்குச் சென்ற மாணவர்கள் ஒன்றிரண்டு வருடங்கள் முறையாகப் பயின்று பட்டயம் பெற்று தங்கள் வாழ்க்கையை நிலைநிறுத்திக் கொள்கின்றனர். மேற்படிப்பு படிக்கும் மாணவர்களுக்கு படிப்பு முடியும்வரை அரசின் உதவித்தொகை தொடரும். பெற்றோர் அனுமதித்தால் அவர்கள் தொடர்ந்து பெற்றோருடன் தங்குவர். அல்லது வெளியே தங்கி, பகுதி நேர வேலை செய்து அந்த வருமானத்தைக் கொண்டு தங்கள் மேலதிக செலவுகளைக் கவனித்துக் கொள்வர். இனி அவரவர் வாழ்க்கை அவரவர் கையில்.

1.தொழில்நுட்பம் (Technology) :
1. Introduction to IT
2. Advanced IT
3. Woodwork
4. Metal craft
5. Food and culture
6. Experience with food
7. People and food
8. Cake mixing and decoration
9. Social occasions
10. Gourmet food
11. Textiles
12. Creative crafts and character
13. Aviation A&B
14. robotics

2. மொழி -LOTE ( Language Other Than English)
1. Japanese A
2. Japanese E
3. Japanese
4. French A
5. French E
6. French
7. Chinese Mandarin
(A – Accelerated, E – Extension)

3. கலை (The Arts):
1. General art
2. Drawing
3. Advanced drawing
4. Costume and set design
5. Ceramics
6. Sculptures
7. Painting
8. Print making
9. Experimental art
10. Drama
11. Media studies
12. Music
13. Advertisements and business graphics
14. Architecture domestic
15. Architecture commercial
16. Visual communication & design
17. Photography
18. Graphics

4. சமூகவியல்(social studies):
1. Australian History
2. American History
3. Asian History
4. Current issues & global studies
5. Australian Geography
6. Environmental geography
7. Teenagers and law
8. Money matters
9. Work life
10. Movies
11. Mind & Meaning

5. சுகாதாரம் மற்றும் உடற்கல்வி (Health & Physical Education)
1. Human sexuality
2. Health & Lifestyle
3. Child development studies
4. General P.E.
5. Advanced P.E.
6. Racquet sports
7. Handball games
8. Stickball games
9. Football games
10. Power sports
11. Sports coaching
12. Leisure studies
13. Outdoor ed. A&B
14. Individual movement
15. Life saving
16. psychology

Read More

அழைப்பது நம் கடமை - 14: ' நம்புங்கள் .. இது இறைவனின் மார்க்கம்! '

பல நூற்றாண்டுகள் கழிந்தாலும், இனவாதிகளின் பண்புகள் ஒரே மாதிரியாகத்தான் இருக்கும்! காலந்தோறும், அவர்கள் இரத்த வெறிப்பிடித்தாடுவார்கள். பிரபஞ்ச வாழ்வியல் திட்டமான இஸ்லாத்தையும் அதைப் பின்பற்றி வாழும் முஸ்லிம்களையும் கொன்றொழிக்கவே முயல்வார்கள்.

உலகில் இஸ்லாத்தைப் போல பேரழிவுகளைச் சந்தித்த வாழ்க்கை நெறி வேறு இருக்க முடியாது! வரலாற்று அறிஞர்கள் வியக்கிறார்கள் இந்த உண்மையைக் கண்டு!

இதுவரை உலகில் லட்சக்கணக்கில் முஸ்லிம்கள் கொல்லப்பட்டனர். அவர்களது உடமைகள் சூறையாடப்பட்டன. மனைவி, மக்கள் கற்பழித்துக் கொல்லப்பட்டனர். தப்பிப் பிழைத்தவர்கள் காலத்துக்கும் அச்சத்துடன் பல தலைமுறை  வரைக்கும் அந்த பீதியில் உறைந்திருந்தார்கள்.

''இனி அவ்வளவுதான்! இஸ்லாம் அழிந்துவிடும்! அது வளருவதற்கான வாய்ப்புகள் இல்லவே இல்லை!''- என்று எதிரிகள் உறுதியுடனிருந்த நேரத்தில் அந்த அதிசயம் மீண்டும்.. மீண்டும் நிகழ்கிறது! இஸ்லாம் என்னும் விருட்சம் இன்னும் ஆழ வேர்ப்பரப்பி வானுயர கொப்பும், கிளைகளுமாக துளிர்விட்டு மகாவிருட்சமாக வளர்கிறது!

நேற்றைய 'அந்தலூசியா' என்றழைக்கப்படும் ஸ்பெயின் முதற்கொண்டு இன்றைய குஜராத் வரையிலான நிகழ்வுகள் முஸ்லிம்களுக்கு எதிரான கொடுமைகளை... அடக்குமுறைகளை...  கொன்றொழிப்புகளை இனத்துடைத்தெறிதலைதான் காட்டுகின்றன!

ஒவ்வொரு காலக்கட்டத்திலும் தோன்றிய இறைவனின் பிரியத்துக்குரிய நல்லடியார்களின் அளப்பரிய தியாகங்களால் மீண்டும் மீண்டும் அந்த அற்புதம் நிகழ்கிறது. அதிலும் குறிப்பாக 13-ஆம், நூற்றாண்டை எடுத்துக் கொண்டால்.. பயத்தால் உடல் சிலிர்த்துவிடும். வரலாறு நெடுக இரத்த வாடை அடிக்கும் அந்த கொடுர சம்பவங்கள் இப்போதும் நம்மை சிலிர்க்க வைக்கும்.

ஒரு நகரைத் தொடர்ந்து மறு நகரம்.. ஒரு பகுதியைத் தொடர்ந்து மறு பகுதி... ஒரு நாட்டைத் தொடர்ந்து மறு நாடு... என்று உலக முஸ்லிம்கள்  கடும் சேதங்களை அடைந்து கொண்டிருந்த நேரம் அது. பகைமை உக்கிரத்தால்.. முஸ்லிம்களும் அவர்கள் பின்பற்றும்  மார்க்கமான இஸ்லாமும் இனி தீர்ந்துவிடும் என்று வரலாறு நடுங்கிக் கொண்டிருந்த நேரம்.

அந்த கோர கொலைப் பட்டியலின் குறைந்தளவு புள்ளிவிவரம் இது:

நிஷாபூர்             -   17 லட்சத்து 47 ஆயிரம் பேர் .
பாக்தாத்              -   16 லட்சம் பேர்.
 ஹீரட்                 -    10 லட்சம் பேர்.
சமர்கண்ட்         -    9 லட்சத்து 80 ஆயிரம் பேர்.
மெர்வ்                 -    7 லட்சம் பேர்.
அலெப்போ       -    80 ஆயிரம் பேர்.
பால்க்                  -    முற்றிலும் அழிந்து போனது.
கிஹ்வா             -    முற்றிலும் அழிக்கப்பட்டு விட்டது.
ஹர்ரான்            -    முற்றிலும் அழிந்தது.

உலகின் பேராபரணம் என்று வர்ணிக்கப்படும் நகரம் பாக்தாத்! நீண்ட நெடிய சோதனை மிக்க அந்த ஆறு வாரங்களில் இந்த அழகான ஆபரணம் குரங்குக் கையில் கிடைத்த பூமாலையைப் போல பிய்த்து எறியப்பட்டது. யூப்ரட்டீஸ் நதி குருதியால் வெள்ளப் பெருக்கெடுத்து ஓடியது. மென்மைக்கும் அழகுக்கும் பேர் போன நகரப் பெண்கள் கொடுரமாக கற்பழித்துக் கொல்லப்பட்டனர்.

ஐந்து நூற்றாண்டுகளுக்கு பொத்தி.. பொத்தி.. பாதுகாத்து வந்த அறிவு... பெரும் சிரமங்களுக்கிடையே சேர்த்து வைக்கப்பட்டிருந்த உலகின் தலைச் சிறந்த நூலகம், தீ வைத்துக் கொளுத்தப்பட்டது. அரிய நூல்கள் சாம்பலாக்கப்பட்டன.

கல்வி-கேள்விகளுக்கும், அற்புதமான கலாச்சாரத்துக்கும், வணிகத்துறைக்கும் கேந்திரமாக விளங்கிய பாக்தாத் மயானக் காடானது. கலைநயத்தைப் பறைச்சாற்றும் பல அற்புதமான கட்டிடங்கள் தகர்க்கப்பட்டன. ரத்த வெறிப்பிடித்த ஆட்சியாளன் செங்கிஸ்கான் நாற்பதாண்டு காலம் முஸ்லிம்களை நடுநடுங்க வைத்தான்.

 அன்றைக்கு ஆட்சியிலிருந்த முஸ்லிம் அரசர் 'முஹம்மது குவாரிஷா' செய்த ஒரு சிறு தவறால் வந்த வினை இது. அன்றைய காலகட்டத்தில் மிகப் பெரும் சக்தியாக விளங்கியவர் இவர். அவருடைய நாட்டுக்கு வணிகம் நிமித்தமாக வந்த மங்கோலியக் குழுவினரை அனுமதி பெறாத காரணம் காட்டி அவர்களைக் கொலைச் செய்ய உத்திரவிட்டார். அதற்கு முறையாக தூதர்களை அனுப்பி எதிர்ப்புத் தெரிவித்த செங்கிஸ்கானின் தூதர்களையும் கொன்றார்.

மனித நேயமற்ற இந்த இரண்டு சம்பவங்கள்தான் செங்கிஸ்கானை பழி வாங்கும் உக்கிரத்தில் தள்ளியது. வரலாற்றில் எராளமான முஸ்லிம்கள் உயிரிழக்கக் காரணமானது.

மங்கோலியப் படைகள், மத்திய ஆசியா, பாரசீக வளைகுடா, புடா பெஸ்ட், மாஸ்கோ என்று புயல் வேகத்தில் இந்தியாவின் தில்லிவரை வந்து சேர்ந்தன.

உலகின் வேறொரு மூலையிலிருந்தவர்கள் சுவீடன் நாட்டவர். அவர்களுக்கு செங்கிஸ்கானால் எந்த ஆபத்தும் இல்லாவிட்டாலும்கூட மங்கோலியர் பெயரைக் கேட்டு நடு நடுங்கினார்கள் அவர்கள்.

வெறும் ஆட்சி - அதிகாரம், ஆடம்பர மோகங்களில் (இன்றைய அரபு ஆட்சியாளர்களைப் போல) திளைத்திருந்த முஸ்லிம்களை வெல்வதற்கு எந்த சிரமமும் இல்லை. ஒரு மங்கோலியன் நூறு முஸ்லிம்களை கொலை செய்யுமளவுக்கு கோழைகளாக இருந்தார்கள். தங்களது உயிர், உடமைகளைக் காத்துக் கொள்ள இயலாமல் அவர்கள் செத்து மடிந்தார்கள்.

'மங்கோலியப் படை தோற்றுவிட்டதென்று யாராவது சொன்னால்... நம்பவே நம்பாதீர்கள்!' - என்று அரபு பழமொழி வழக்கத்தில் ஏற்படுமளவுக்கு நிலைமை மோசமாக இருந்தது.

மங்கோலியர் சாம்ராஜ்ஜியம் கொடி கட்டிப் பறந்தபோது, முஸ்லிம் ஆட்சியாளர்கள் ஒழுக்க வீழ்ச்சியில் மூழ்கித் திளைத்தார்கள். ஊழல், அதிகார வெறி அவர்களிடையே மிகைத்துப் போனது. உலகாயதப்போக்கே அவர்களிடம் பிரதானமாக காணப்பட்டது.

தலைமைத்துவ தகுதியின்மைக்கு 'குவாரிஜயம் ஷா' மட்டுமே உதாரணம் அல்ல. அப்பாஸிய கலீஃபா 'அல் முஸ்த அஸிமின்' நிலைமையும் அதுதான்! குவாரிஜம் ஷாவின் அரசாட்சி வீழ்ந்தது என்று கேள்விப்பட்டதும், தனிப்பட்ட வெறுப்பை பொது வெறுப்பாக்கி அகமகிழ்ந்தார் அப்பாஸிய கலீஃபா அல் முஸ்த அஸீம். மங்கோலியர்கள் பாக்தாத்தை அடையும் முன்னரே கலீஃபாவின் ஆலோசகர்கள் தமது படைவீரரை விலக்கிக் கொள்ளும்படி கலீஃபாவுக்கு அறிவுறுத்தினார்கள். இந்தக் கோழைத்தனம் அப்பாஸிய ஆட்சி வீழ்வதற்கு போதுமானதாக இருந்தது.

இந்தக் கொடுமைகளாலும் இஸ்லாம் அழிந்துவிடவில்லை.

'தான் இறைவனின் பேரழிவு!', 'இறைவனால் அனுப்பப்பட்ட வேதனை!'- என்று தன்னைத்தானே அதிகாரப்பூர்வமாக அறிவுறுத்திக் கொண்டான் செங்கிஸ்கான்! கைப்பற்றிய  நாட்டு முஸ்லிம் பெண்களின் கற்பைச் சூறையாடினான். கொலைக்காரர் குஜராத் மோடி செய்தது போலவே நிறைமாத கர்ப்பிணிப் பெண்களையும் கற்பழித்து ... வயிற்றைக் கிழித்து.. குழந்தைகளை வாளால் குத்திக் கொன்றான். ஒரு தலைமுறைக்கு முஸ்லிம்களைத் துன்பங்களும், துயரங்களும் சூழ்ந்து கொண்டன.

அதன் பிறகு இறைவனின் பேரருள் மீண்டும் முஸ்லிம் சமுதாயம் மீது பொழிந்தது. தனது அடியார்கள் சோதனைகளால் பெற்ற படிப்பினைகள் போதும்! என்று கருணை வாய்ந்த இறைவன் எண்ணினான் போலும்! மீண்டும் இஸ்லாத்துக்கு சாதகமாக காற்று வீச ஆரம்பித்தது.

பாக்தாத் செங்கிஸ்கான் பேரனால் முற்றிலும் அழிக்கப்பட்டுவிட்டது. அதன் பிறகு செங்கிஸ்கானின் கொள்ளுப் பேரன் 'பெர்க்' இஸ்லாத்தைத் தழுவினார்.

மங்கோலியர்களின் கொடும் சகாப்தம் முடிவுக்கு வந்தது.

 

மிக முக்கியத்துவம் வாய்ந்த இந்த வரலாற்று நிகழ்வுகளில் இரண்டு சாமான்யமானவர்களின் பங்கு முக்கியமானது!

'பெர்க்' அல்லது 'பரகா கான்' என்று அழைக்கப்படும் செங்கிஸ்கானின் கொள்ளுப் பேரனுக்கு இஸ்லாம் இரண்டு வணிகர்களால் பரிச்சயமானது. இந்த முயற்சியின் விளைவாக இஸ்லாம் ரஷ்யா, கிழக்கு ஐரோப்பா வரை சென்று சேரக் காரணமானது!

பாரசீகத்ததைச் சேர்ந்த வணிகரான ஜமாலுத்தீன் தனது வணிகப் பயணம் நிமித்தமாகச் செல்லும் போது, மங்கோலிய இளவரசன் துக்ளக்கின் உயர் பாதுகாப்புப் பகுதியான விளையாட்டுத் திடலுக்குள் நுழைந்துவிட்டார். தெரியாமல் நடந்துவிட்ட சம்பவத்துக்கு அவர் கைது செய்யப்பட்டு இளவரசன் முன்பாக நிறுத்தப்பட்டார்.

செங்கிஸ்கானின் பரம்பரையில் உதித்த துக்ளக்கிற்கு பாரசீக முஸ்லிம்கள் என்றால்... விலங்குகளைவிட மட்டமானவர்கள் என்று நினைப்பு! பௌத்தமும், கிருத்துவமும் அவரது அரசாங்கத்தின் அதிகாரப்பூர்வமான மதங்களாக இருந்தன என்பது குறிப்பிடத்தக்கது!

இந்த எண்ணத்தாலேயே துக்ளக் ஜமாலுத்தீனை ஏளனமாகப் பார்த்து கிண்டலாகச் சொன்னானர்: "பாரசீகர்களைவிட நாய்கள் எவ்வளவோ மேல்!"

கொஞ்சமும் அச்சப்படாமல் ஜமாலுத்தீன் பதிலளித்தார்:

"உண்மைதான் அரசே! நாங்கள் இஸ்லாத்தைத் தழுவியிருக்காவிட்டால்.. தெரு நாய்களைவிட கேவலமாக இருந்திருப்போம்!"

சலனமற்ற இதயத்திலிருந்து அச்சமற்று வெளிப்பட்ட இந்த பதில் துக்ளக்கை சிந்திக்க வைத்தது. இஸ்லாம் பற்றி அறிந்து கொள்ள அதுவே திருப்புமுனையாக அமைந்தது!

ஜமாலுத்தீன் துக்ளக்குக்கு இஸ்லாம் குறித்து விரிவான முறையில் பரிச்சயம்  செய்தார். இஸ்லாத்தை ஏற்றுக்கொள்ள முடிவெடுத்த துக்ளக் ராஜாங்க காரணங்களையொட்டி தனது முடிவை அறிவிக்க சிறிது அவகாசம் கேட்டார். சிறிதுநாள் கழித்து தன்னை வந்து பார்க்கும்படியும், தனது வாக்குறுதியை நினைவுறுத்தும்படியும் ஜமாலுத்தீனை அவர் கேட்டுக் கொண்டார்.

ஊர் திரும்பிய ஜமாலுத்தீன் சிறிது நாளிலேயே நோயுற்றார். மரண வேளையில் அவர் தனது மகனான ரஷீதை அழைத்தார். இளவரசர் துக்ளக் குறித்து நடந்தவற்றை விவரித்தார். இஸ்லாம் ஏற்றுக் கொள்வது சம்பந்தமான உறுதிமொழியை அவருக்கு நினைவுறுத்தும்படி கேட்டுக் கொண்டார்.

துக்ளக் அரியணையில் அமர்ந்திருந்த சமயம் அது.

அவரை சந்திப்பது அவ்வளவு எளிதாக இல்லை. கடைசியில் அரண்மனை அருகே தொழுகைக்கான அழைப்பை விடுத்து துக்ளக்கின் கவனத்தை ஈர்த்தார் ரஷீத். அதன் பின் துக்ளக் இஸ்லாத்தைத் தழுவுவதற்கு உதவினார். 'துக்ளக் தைமூர் கான்' என்ற பெரும் பிம்பம் வரலாற்றில் பதியக் காரணமானார்.

துன்பங்களும், துயரங்களும் சத்தியத்தை என்றென்றும் சூழ்ந்திருப்பவை! பெரும் மலையிலிருந்து உருண்டுவரும் நீர்வீழ்ச்சியைப் போன்றவை! பாக்தாத், ஆப்கான், நேற்றைய குஜராத் எல்லாமே இறைவனின் சோதனைகள்தான்!

இந்த துன்பங்களுக்கும், துயரங்களுக்கும் மறுபக்கம் உண்டு என்பதற்கு சாமானியர்களான ஜமாலுத்தீன் மற்றும் ரஷீத் போன்றோரின் அழைப்பியல் வரலாறே சாட்சி!

ஆமாம்! அழைப்புப் பணியில் ஈடுபடுவோர் உறுதியுடன் நம்புங்கள்... இது இறைவனின் மார்க்கம்!

வாள் வீச்சுகளையும், துப்பாக்கித் தோட்டாக்களையும், நவீன லேசர் ஆயுதங்களையும் தாண்டி வரலாற்றில் நிலைத்திருக்கும் மார்க்கம்!

கியூபாவின் குவாண்டனாமோ சிறைச்சாலைகளும், ஈராக்கின் அபூகாரிப் சிறைகளையும் தாண்டி மீண்டெழும் மார்க்கம்!

நம்புங்கள் தோழர்களே! இது இறைவனின் மார்க்கம்! படைத்தவனால் தனது படைப்புகளுக்காக அருளப்பட்ட பேரருள் மார்க்கம்!

- இறைவன் நாடினால்.. அழைப்பது தொடரும்.

 அழைப்பது நம் கடமை: முந்தைய தொடர்களை வாசிக்க:
''''''''''''''''''''''''''''''''''''''''''''''''''''''''''''''''''''''''''''''''''''''''''''''

1. அந்தக் கடலோரக் கிராமத்தின் கதை : http://ikhwanameer.blogspot.in/2015/07/1_23.html 

2. கிராமவாசியின் செயலும், நபிகளாரின் அணுகுமுறையும் : http://ikhwanameer.blogspot.in/2015/07/blog-post_49.html 

3. படிப்பினை மிக்க அந்த இறைத்தூதரின் வரலாறு : http://ikhwanameer.blogspot.in/2015/08/3.html 

4. அழைக்க வேண்டும் ஏன்? : http://ikhwanameer.blogspot.in/2015/08/4.html 

5. சகல லோகங்களின் இறைவன் : http://ikhwanameer.blogspot.in/2015/08/5.html 

6. சான்று வழங்குதல் என்றால் என்ன? http://ikhwanameer.blogspot.in/2015/08/6_14.html 

7. கடல் பிளந்தது. நெருப்பு குளிர்ந்தது : http://ikhwanameer.blogspot.in/2015/08/13_18.html 

8. அந்த நாள் வரும்முன் : http://ikhwanameer.blogspot.in/2015/08/8.html 

9. அழைப்பாளர்களின் இலக்கு: http://ikhwanameer.blogspot.in/2015/08/9_22.html 

10 ஊடகங்களின் இரண்டு அளவுகோல்கள்: http://ikhwanameer.blogspot.in/2015/08/10_24.html 

11.அடிப்படை விஷயங்களும், அழைப்பாளர்களும் : http://ikhwanameer.blogspot.in/2015/09/11.html 

12. கடைநிலைக் காவலராய் ஒரு ஜனாதிபதி : http://ikhwanameer.blogspot.in/2015/09/12.html

 

Read More

எனது நூல்கள்: சிறார் இலக்கியம்: முதல் மனிதனின் கதை: என்னுரை

ஒவ்வொரு மனிதனும் நியாயமான தன் அன்றாட தேவைகளுக்கு தனது வாழ்வில் பல லட்சங்களை சம்பாதிக்க வேண்டியிருக்கிறது. ஆனால், மனிதனின் வாழ்நாள் என்பது, ஒரு 50 ஆயிரம் நாட்களையும் தாண்டுவதில்லை என்பது உங்களுக்குத் தெரியுமா?

மனிதனின் ஆயுட்காலம் நூறு ஆண்டுகள் என்று வைத்துக் கொண்டாலும் அவன் 40 ஆயிரம் நாட்களையும் நெருங்குவதில்லை; 40 ஆயிரம் நாட்கள்கூட அவன் இந்த உலகத்தில் வாழ்வதில்லை என்பது எவ்வளவு விசித்திரம்!

ஒரு துளி நீரிலிருந்து வெளிப்பட்ட கண்ணுக்கே தெரியாத ஒரு நுண்ணுயிரிதான் மனிதனின் துவக்கம்.

அதன்பின், ரத்தக் கட்டியாகி, பரிபூரண தேவைகளுடன் அமைந்த கருவறை என்னும் ஆலையில் எலும்பு, தசை, தோல் என்று அடுக்கடுக்கு போர்வைகளுடன் நாளொரு மேனி பொழுதொரு வண்ணமாக வடிவமைப்புகள் பெறுபவனே மனிதன்.

•    வாழ்க்கையும் நிஜம்.
•    சுக, துக்கங்களும் நிஜம்,
•    வெற்றித் தோல்விகளும் நிஜம்.
•    வலியும், சந்தோஷங்களும் நிஜம். அதுபோல,
•    மரணமும் நிஜம்.

ஆக பிறப்பிலிருந்து இறப்பு வரையிலான இடைப்பட்ட காலத்தில் வாழும் நிஜமான வாழ்க்கைக்கான வழிகாட்டல் அவசியம்.

இறப்புக்கு பின்னே உள்ள நிலைமை குறித்து ஆய்வும் அதைவிட அவசியம்.

வெறும் உக்கி, மக்கி மண்ணோடு மண்ணாகி ‘மௌனத்தில்’ மனித வாழ்க்கை கரைந்து போனால் பரவாயில்லை!

ஆனால், ஒருவேளை.. ஆம்… ஒருவேளை… இறப்புக்கு பின் ஒரு வாழ்க்கை, வாழ்ந்த வாழ்க்கையின் எதிர்வினைகளாய் அதில் நல்லது, கெட்டதுகள் என்று இருந்துவிட்டால் … என்ற தேடலின் முடிவாய் நான் தேர்ந்தெடுத்ததுதான் இஸ்லாம்.

தன்னை பகுத்தறிவாளனாக காட்டிக் கொள்பவனும் தனக்கு எதிர்வினைகளாய் அமைந்த நம்பிக்கையின் அடித்தளங்களில்தான் வாழ்வியல் வீடமைக்கிறான்.

தன்னை இறைமறுப்பாளனாக காட்டிக் கொள்பவனும் தனக்கென்ற பொருள்முதல்வாதம் போன்ற நம்பிக்கைகளின் கட்டமைப்பில்தான் வாழ்வியலைத் தேர்வு செய்கிறான்.

சக மனிதர்களை கடவுள்களாக்கிக் கொள்கிறான். மனோ இச்சைகளை தெய்வங்களாக்கிக் கொள்கிறான். மனித படைப்புகளை மூலதனமாக வேதங்களாக்கிக் கொள்கிறான்.

இவர்கள் இருவரோ அல்லது பலரோ வேறு வேறானலும் வாழும்வரை அனுபவி என்ற ஒரே மனோநிலை கொண்டவர்கள். யாருக்கும் அஞ்சத் தேவையில்லை என்று சொந்த மனித சமூகத்தில் அவலங்களை சிருஷ்டித்து சுகம் காண்பவர்கள்.

பகுத்தறிவு மனோநிலையில், அடுத்தவர் உரிமைகளைப் பறிக்கும் பலவான்களாக, ஏகாதிபத்தியவாதிகளாக, இரும்பு திரைக்குள் மக்களை அடக்கியாளும் சர்வாதிகாரிகளாக வரலாற்றில் இடம் பெற்றவர்கள்; இடம் பெற போகிறவர்கள்.

அதேபோலதான்,

•    இறைவன் ஒருவன்! கண்ணுக்குத் தெரியாத மாபெரும் சக்தியானவன். சகலங்களின் உரிமையாளன். அதிபதி.
•    அவனது சட்டங்களின் அடிப்படையில்தான் சகல லோகங்களின் இயக்கமும் நடக்கிறது.
•    அதனால்தான் உலகில் அமைதி நிலவுகிறது.
•    மனிதனும் அந்த சட்டங்களுக்கு உட்பட்டு வாழ முன்வரவேண்டும்.
•    படைப்புகள் அனைத்தும் பெரும் நோக்கத்துக்காகவே படைக்கப்பட்டவை. வீணுக்காக அல்ல.
•    ஒவ்வொரு வினையும் அதற்கு இணையான எதிர்வினை கொண்டது.
•    விதைப்பவைதான் முளைக்கும்.
•    படைப்புகள் ஒருபோதும் இறைவனாக முடியாது!

என்று பகுதித்தறிவு ரீதியான தர்க்கத்தில் விடைகண்டு இறைநம்பிக்கையாளனாக தன்னை வடிவமைத்துக் கொள்கிறான்.

குரங்கிலிருந்து தோன்றியவன் என்ற மிருகவாதத்திலிருந்து விடுபட்டு மனிதனாய் மீண்டெழுகிறான். தான் இறைவனின் பிரதிநிதி என்ற அந்தஸ்தை உணருகின்றான். தன் அதிபதி அளித்த வாழ்வியல் அமைப்பை பின்பற்றி அமைதி விரும்பியாய் வாழ எத்தனிக்கின்றான். சமூகம் முழுக்க அமைதியையும். சுபிட்சத்தையும் விதைக்க முயல்கிறான். அதற்காகவே தனது வாழ்வை அர்ப்பணிக்கின்றான்.

•    இறைவன் உண்டு; இல்லை என்னும் நம்பிக்கையை அடித்தளமாக கொண்ட இவர்கள் இருவரும் சமமாவார்களா? அல்லது
•    இருவேறுபட்ட பின்விளைவுகள் தரும் இவர்கள் இருவரின் சித்தாந்தம்தான் சமமாகுமா?

இத்தகைய பல கேள்விகளை எழுப்பி இறைமறுப்பிலிருந்து இறைநம்பிக்கையின் பக்கம் அழைப்பதே மனிதனின் கதை என்னும் இந்த நூலின் நோக்கமாகும்.

இது 1994-1995ம், ஆண்டுகளில் சமரசம் இதழில் ‘ஆதிமனிதனின் கதை’ என்னும் தலைப்பில் தொடராக வந்து, வாசகர்களின் பெரும் வரவேற்பை பெற்றது.

கதைத்தல் அதாவது சொல்வதுதான் கதை என வழங்கப்படுகிறது. அவ்வகையில் மனிதனின் கதை திருக்குர்ஆனின் திருவசனங்களை அடிப்படையாகக் கொண்டு எழுதப்பட்ட வரலாற்று நூல் எனலாம்.

இந்த நூலை, பிரசுரிக்க முன்வந்த ‘சாஜிதா’ புக் சென்டரின் உரிமையாளர் சகோதரர் ஜக்கரிய்யாவுக்கு நன்றி.

இறைமறுப்பு மற்றும், நாத்திகவாதம் என்னும் கொடும் நோய்த்தாக்குதல்களிலிருந்து தங்கள் பிள்ளைகளை மீட்டெடுக்க நினைக்கும் ஒவ்வொரு பெற்றோருக்கும் இந்த நூல் பெரும் உதவியாய் இருக்கும் என்று நம்புகின்றேன்.

தமிழ் கூறும் நல்லுலகம் வழக்கம்போல எனது நூல்களுக்கு தொடர்ந்து ஆதரவு அளிக்கும் என்றும் நம்புகின்றேன்.

இறைவன் நமது வாழ்வின் நோக்கத்தைப் புரிந்து செயல்படுத்த அருள்புரிவானாக! உலக மக்களின் அமைதிக்கும், சுபிட்சத்துக்கும் துணைப் புரிவானாக!

அன்புடன்,

‘மழலைப்பிரியன்’ (இக்வான் அமீர்)
‘மனித நேயக் குடில்’
14, 5வது குறுக்குத் தெரு.
உலகநாதபுரம், எண்ணூர்,
சென்னை 600057.
தொலைபேசி: 044 – 25751374,
செல்பேசி: 9840220125.
மின்னஞ்சல் முகவரி: ikhwan57@gmail.com ikhwan57@rediffmail.com

Read More

இக்வான் காமெடி: அம்மா..! அம்மா.. நீ எங்கேயம்மா..?

"நீங்க இப்படி ஏதாவது செய்வீங்கண்ணு தெரியும்மா... மொத்த பயன்பாட்டுலே 100 யூனிட் கழிச்சு கணக்கு போட்டாதான் எங்களுக்கு லாபம். நீங்க இப்ப போட்டிருக்கிற கணக்கு அரசியல் ஆதாயம்! இதுதான் உங்க அரசியல் சாமார்த்தியமம்மா!”

Read More

இஸ்லாம் வாழ்வியல்:சாந்தி நிலவட்டும்

இறை நம்பிக்கையாளர்கள் பரஸ்பரம் தங்களுக்கிடையே அன்பையும், மகிழ்ச்சியையும் பரிமாறிக்கொள்ள ஒரு அழகிய வாழ்த்து மொழியை திருக்குர்ஆன் சொல்கிறது. இரண்டு உள்ளங்களின் பிணைப்புக்கான அழகிய பிரார்த்தனையான அதை ஒருவர் மற்றவரின் நலம்நாடிப் பிரார்த்திக்க வேண்டும். ஒருவர் “அஸ்ஸலாமு அலைக்கும்!”, அதாவது உங்கள் மீது சாந்தி நிலவட்டும் என்று கூற, அடுத்தவர் “வ அலைக்கும் சலாம்!”, உங்கள் மீதும் சாந்தி நிலவட்டும்! என்று பதிலாய்ச் செய்ய வேண்டிய பிராத்தனை அது.

“நீங்கள் இறை நம்பிக்கையாளராய் ஆகும்வரை சுவனம் புக மாட்டீர்கள். நீங்கள் உங்களிடையே அன்பு பாராட்டாதவரை இறைநம்பிக்கையாளராய் ஆக மாட்டீர்கள். நீங்கள் உங்களுக்கிடையே அன்பை அதிகரித்துக்கொள்ளும் வழிமுறையொன்றை நான் கற்றுத் தரட்டுமா? நீங்கள் உங்களுக்கிடையே சலாத்தைப் பரப்புங்கள்” என்று நபிகளார் அறிவுறுத்துகிறார்.

அஸ்ஸலாமு அலைக்கும் என்று ஒருவர் சொல்லும்போது, பதில் முகமனாய் சலாம் கூறுபவரும் இத்தனை உட்பொருளையும் உள்வாங்கி பதிலளிக்கும்போது அன்பு, அமைதி, சாந்தியின் ஊற்றான இறைவனின் பேரருள் முதலில் சலாம் சொன்னவர் மீதும் பொழிகிறது.

இறைவனின் திருநாமங்களில் ஒன்றான அஸ்ஸலாமை அதிகதிகமாகப் பரப்பும்படி நபிகளார் அறிவுறுத்துகிறார்: “அஸ்ஸலாம் இறைவனின் திருநாமங்களில் ஒன்று. பூமியில் வசிப்போருக்காக அதை இறைவன் தேர்ந்தெடுத்துக்கொண்டான். அதனால், சலாத்தை அதிகம் பரப்புங்கள்!”

இறை நம்பிக்கையாளர்களின் உயிர் பறிக்கும் அந்த இறுதி தருணத்தில் வானவர்கள் சலாம் எனப்படும் இந்த வாழ்த்துரையைத்தான் கூறுவார்கள் என்கிறது திருக்குர்ஆன். அதேபோல, சுவனவாசல்களில் இந்த வாழ்த்துரையோடுதான் சுவனவாசிகள் வரவேற்கப்படுவார்கள். சுவனத்தின் எட்டுத் திக்கிலும் சலாம்.. சலாம் என்ற வாழ்த்துரைதான் கேட்டவாறு இருக்கும் என்கிறது திருக்குா்ஆன்.

ஒருமுறை ஒருவர் நபிகளாரிடம் வந்து, “இறைவனின் திருத்தூதரே! “இஸ்லாத்தில் சிறந்த செயலொன்றை எனக்குக் கூறுங்கள்!” என்று கேட்டார்.

“ஏழைகளுக்கு உணவளிப்பதும், அவர் தெரிந்தவராக இருந்தாலும், தெரியாதவராக இருந்தாலும் அவருக்கு சலாம் கூறுவதும் மிகச் சிறந்த செயல்களாகும்!” என்று நபிகளார் அதற்கு பதிலளித்தார்.

நபித்தோழர் துஃபைல் தமது அனுபவம் ஒன்றைப் பகிர்ந்துகொள்கிறார்.

“நான் அப்துல்லாஹ் பின் உமர் (ஜனாதிபதி உமரின் மகன்) அவர்களின் அவைக்கு அடிக்கடி செல்வேன். அவருடன் சேர்ந்து கடைவீதிக்கும் செல்வேன். அப்படிச் செல்லும்போது, எங்களைக் கடந்து செல்லும் ஒவ்வொருவருக்கும் அப்துல்லாஹ் பின் உமர், சலாம் சொல்வார். அவர் சாதாரண மனிதராக இருந்தாலும் சரி, ஒரு வணிகராக இருந்தாலும சரி அல்லது ஏழைபாழையாக இருந்தாலும் சரியே!

ஒருநாள் நான் அவருடைய அவைக்குச் சென்றிருந்தேன். வழக்கம்போல கடைவீதிக்குச் செல்ல என்னை அப்துல்லாஹ் பின் உமர் அழைத்தார். எனது நீண்ட நாள் சந்தேகம் ஒன்றை அப்போது கேட்கும் வாய்ப்பாக அதைப் பயன்படுத்திக்கொண்டேன். “நண்பரே! கடைவீதிக்குச் செல்லும் நீங்கள் எதையும் வாங்குவதில்லை! எந்தப் பொருளின் விலையையும் கேட்பதுமில்லை! அங்குள்ள மக்களோடு அமர்ந்து உரையாடுவதுமில்லை. பிறகு எதற்குதான் கடைவீதிக்கு செல்கிறீர்கள்?”

“நாம் கடைவீதிக்கு வரும் மக்களுக்கு சலாம் சொல்லத்தான் செல்கிறோம் நண்பரே.. வாருங்கள் போகலாம்!” என்று புன்னகையுடன் அப்துல்லாஹ் பின் உமர் என்னை அழைத்துச் சென்றார்.

‘சலாம் சொல்வதில் கஞ்சனாய் இருக்க வேண்டாம்!’ என்று மற்றொரு நபித் தோழர் அபூஹுரைராஹ் அறிவுறுத்துகிறார்.

“சலாம் சொல்வதில் முந்திக் கொள்பரே இறைவனின் நெருக்கத்திற்கு உரியவர் ஆவார்!” என்கிறார் நபிகளார்.

“சாந்தி நிலவட்டுமாக!”

(26.05.2016 அன்றைய தி இந்து, ஆனந்த ஜோதியில், பிரசுரமான எனது கட்டுரை) 

 

Read More